Поранешниот претседател на Динамо Загреб, Здравко Мамиќ зборуваше за настапот на селекцијата на Србија на Светското првенство во Катар.

Србија со големи очекувања допатува во Катар, но на крајот заврши како последна во групата зад Бразил, Швајцарија и Камерун со само еден освоен бод од ремито со Камерун. Мамиќ смета дека проблемот за репрезентацијата не се фудбалерите, а од Пикси очекувал повеќе.

„Често пати ме прашуваат зошто Србија нема резултати како Хрватска. Одговорот ми беше едноставен додека не дојде Пикси, многу верував во него и би кажал дека Србија пред него и со него не е истиот тим, но сега на СП видов дека се покажаа старите српски навики. Во некои моменти имаа и двојно подобри играчи од нас, но никогаш не направија посебен успех. Мислам дека репрезентацијата ја создаваа по кафулиња и ресторани“.

Мамиќ верува дека ако Хрватска имала напаѓачи како Митровиќ и Влаховиќ многу веројатно ќе играла финале на ова Светско првенство.

„Изгледаа крајно неорганизирано на ова СП. Се однесуваа лошо, за тактичката дисциплина и да не зборувам. Очекував да одат до крај…Ако Хрватска имаше напаѓачи како Влаховиќ и Митровиќ ќе играше финале. Честитки за Петковиќ, Будимир, Ливаја, Крамариќ…Сепак, двајцата кои ги споменав се друга димензија“, смета Мамиќ.

Хрватска за разлика од Србија се уште е дел од Светското првенство, но во четвртфиналето ја очекува тежок испит против Бразил.