Во седмата епизода на „Мамавизија“ ја имаме мајката Ирина Камилоска, мајка на малиот Јосиф и бебето Лена, сопруга на пејачот Павле Камилоски.
Остана забележана во јавноста по тоа што планинареше и во деветтиот месец од бременоста, а на Водно се качи и со мало бебе во кенгур.

Оваа хероина, дополнително, инспирираше многу мајки да се охрабрат да излезат од дома со своите деца, мотивираше повеќе од 70 мајки да излезат во природа заедно со децата, каде што меѓусебно ќе си даваат поддршка и ќе споделуваат совети и успеа да го разбие стравот кај нив да се качат на планина со бебе.
Алпинистката ја стави експедицијата на мирување извесен период и ја замени со најважната улога во животот – мајка.

Таа го има искачено Ама Даблам на Хималаите, но за „Мамавизија“ раскажува за една многу потешка експедиција со која се соочила неодамна.

– Тргнавме на патување до Црна Гора, замислете со две мали деца, едното бебе. Патувањето го поминавме добро, но за седнувањето на ручек во еден отмен ресторан бевме оптимисти. Не знам како можевме да си замислиме дека ќе седиме и нормално ќе јадеме. Ни ја донесоа храната, пијалаците, но на Јосиф многу му се допадна дворот и не седна на маса, беше убаво уреден со фонтани. Тој е уште многу мал и мора некој постојано да го надгледува да не падне. Лена, пак, реши дека не сака да спие и дека ѝ се плаче, баш тогаш. Па така, јас бев на едниот крај од ресторанот за да ја смирам неа, а Павле да го припазува Јосиф. И така, многу убаво си поминавме – низ смеа раскажува таа.

Емисијата „Мамавизија“ премиерно ќе можете да ја погледнете вечерва со почеток во 20 часот на јутјуб-каналот на „Слободен печат“.
Водител и автор е Александра Вуксановиќ.