Во новата епизода на емисијата „Мамавизија“ зборуваме за едно специфично скопско семејство. Наша хероина е Зорица Николовска, мајка на Мартин и Јана и маќеа на Иван.
Николовска отворено раскажува за нејзината добра конекција со мајката на нејзиниот посинок и дека и тоа е возможно доколку се сака.

Открива дека и нејзините родители се разведени и дека ја почувствувала таа болка и на своја кожа.

-Не мора секогаш маќеата да биде лоша, како што најчесто е прикажано во приказните. Во реалноста најважно е децата да се среќни. Поради сплет на околности мојот сопруг се развел, тоа не значи дека јас и неговата поранешна жена треба да се мразиме, напротив, кога има дете во приказната ние треба да соработуваме за заеднички да го израснеме тоа невино суштество. И јас потекнувам од семејство на разведени родители и точно знам колку е тешко да треба да одбираш помеѓу мајка и татко – вели таа.

Нашата соговорничка за првпат зборува и за проблемот со полицистични јајници.

-Докторите ми рекоа дека имам полицистични јајници, состојба во која многу тешко се стасува по природен пат до бебе. Тоа ме обесхрабри многу и мислев дека никогаш нема да станам мајка. Го имав прифатено тоа дека имам посинок и дека Господ ми го пратил Иван преку него да го покажам моето мајчинство. Неговата желба беше голема да му родам братче, па затоа неслучајно велам дека тој е „виновникот“ за тоа што јас се опуштив и за некое чудо по природен пат останав бремена – вели таа.

Николовска е позната водителка, дел од популарната радиоемисија „Тик Так и Зорка“, таа е автор на „Дневникот на трудници“ и поткастот „Труднички муабети“.

Гледајте премиерно „Мамавизија“ вечерва во 20 часот на јутјуб-каналот на „Слободен печат“. Водител и автор на емисијата е Александра Вуксановиќ.