
Малите партии порачаа дека не ја менуваат страната
Драго ми е дека ВМРО-ДПМНE го смени ставот за една изборна единица. Ова е позитивен исчекор, но сега уште помалку гледам причина за предвремени парламентарни избори, вели за „Слободен печат“ Маја Морачанин, претседателка на ДОМ.
Помалите партии го поздрaвуваат ставот на лидерот на ВМРО-ДПМНЕ Христијан Мицкоски дека е спремен да разговара за промена на изборниот модел од шест во една изборна единица, но му порачуваат дека не ја менуваат страната, односно да не смета на нивна поддршка за предвремени парламентарни избори. Малите партии идната недела ќе иницираат средби со претседателот на Собранието Талат Џафери и со координаторите на СДСМ и ДУИ Јован Митрески и Арбр Адеми за промена на изборниот модел.
Препорачано
Мицкоски на Водици од Охрид побара брзи предвремени парламентарни избори и најави дека опозицијата ќе достави измени на Изборниот законик за да се укине техничката влада и дека е подготвен да разговара за една изборна единица.
Трајанов: Добро е да има консензус за Изборниот законик
Претседателката на ДОМ, Маја Морачанин, вели дека барањето за една изборна единица не е поврзано со барањето на опозицијата за предвремени парламентарни избори.
– Мене ми е драго дека ВМРО-ДПМНE го смени ставот за една изборна единица. Тоа ни оди во прилог, затоа што и СДСМ прифаќа промена на изборниот модел. Ова е позитивен исчекор на ВМРО-ДПМНЕ, која првпат се изјаснува дека би прифатиле една изборна единица. По ова, сега уште помалку гледам причина за предвремени парламентарни избори – вели Морачанин за „Слободен печат“.
Таа повторува дека тоа барање е од пред неколку години и потсетува дека ВМРО-ДПМНЕ и ДУИ претходно во Собранието го блокирале нивното барање со 3.000 амандмани. Лани во март повторно доставиле предлог за измени на изборниот модел и за отворени листи, но досега Џафери не отворил расправа за тоа. Според Морачанин, право на опозицијата е да бара предвремени избори, но ДОМ не планира да ја промени страната, ниту да биде една од партиите што ќе поддржи распуштање на Собранието.
И претседателот на Демократски сојуз Павле Трајанов ни изјави дека во приоритетите на новата владина програма со новиот премиер Димитар Ковачевски се предвидени реформи на изборното законодавство, односно анулирање на системската предност на четирите големи партии на изборите, како и една изборна единица без праг и пропорционален изборен модел.
– Ќе видиме како ќе се одвиваат работите. Идната недела ќе иницирам средба со претседателот на Собранието и со координаторот на пратеничката група на СДСМ Јован Митрески за да ги усогласат ставовите со ДУИ. Добро би било ВМРО-ДПМНЕ да прифати една изборна единица и со тоа би се постигнал консензус за измени на Изборниот законик. Ќе иницирам средба и со лидерот на ДУИ Али Ахмети или со координаторот на пратеничката група на ДУИ, Арбр Адеми. Но Демократскиот сојуз не учествува во никакви активности на опозицијата. Не сме дел од нивниот процес ниту учествуваме во пазарења за промена на мнозинството или во иницирање предвремени избори – вели Трајанов.
Груби: И со техничка и без техничка влада премиер Албанец ќе има
Се очекува ВМРО-ДПМНЕ деновиве да го достават до Собранието предлогот за измена на Изборниот законик.
– Подготвени сме и до Собранието ќе доставиме измени на Изборниот законик, во кои нема да има техничка влада односно сто дена губење време на граѓаните, туку ќе го користиме оној уставен рок од 45 до 60 дена – рече Мицкоски.
Тој му порача на СДСМ дека прифаќа да останат нивните министри за внатрешни работи и за труд и социјала и дека ВМРО-ДПМНЕ нема да предложи заменици министри во земјоделство, финансии, во информатичко општество, само за да одржат предвремени парламентарни избори.
ДУИ и натаму не открива дали за нив е прифатлив предлогот за една изборна единица, додека партијата на Ахмети не е против укинување на техничката влада. Од ДУИ велат дека и да има и да нема техничка влада, премиер Албанец во последните 100 дена на владата ќе има.
– Изборниот законик треба да биде усвоен консензуално, а не еднострано затоа што Законикот ги определува правилата за сите. Во однос на укинувањето на техничката влада, тоа е став на ДУИ уште од пред изборите, затоа што е апсурдно членка на НАТО и земја со зелено светло за отпочнување преговори за членство во ЕУ да има техничка влада за спроведување избори поради недовербата во институциите преку нефункционален систем којшто ја блокира Владата. Тоа беше и дел од коалицискиот договор. Нема ниту една последица по договорот за прв премиер Албанец затоа што не се заемно зависни, затоа што укинувањето на техничката влада и политички премиер со полни надлежности во последните 100 дена влада беше и останува дел од договорот, кој гледаме дека го почитува и ВМРО-ДПМНЕ, но и парламентарните партии на Албанците ветија дека ќе гласаат за – вели првиот вицепремиер Артан Груби за „Слободен печат“.