Малишиќ: Поевтината струја ќе донесе поевтина храна, но ќе видиме дали тоа ќе биде 10 отсто
Кога ги правевме овие пресметки кои јавно неодамна и ги соопштивме, Путин не го сопре извозот на жито – вели Малишиќ.
Производителите на храна очекуваат од декември да почне да им се испорачува електрична енергија по 80 евра за мегават-час, согласно мерката на Владата што ја најави овој викенд. Тие се задоволни од оваа интервенција на Владата и како што велат, согласно „пазарната логика се очекува и намалување на цените на храната“.
Препорачано
– Во октомври просечната цена за електрична енергија што ја плаќавме на слободниот пазар беше 400 евра за мегават, во септември просекот беше 600 евра, а во август меѓу 650 и 700 евра. Ова беше многу тежок период за компаниите и повеќе фирми од мелничко-пекарската индустрија привремено престанаа со работа. Со мерката на Владата очекуваме „смирување“ на сегашната состојба во нашиот сектор, но воопшто и во комапниите за храна. Согласно пазарната логика се очекува намалување на цената на храната – изјави за „Слободен пачет “ Горан Малишиќ. претседател на Групацијата на мелничко-пекарската индустрија при Стопанската комора.
Но колкаво намалување на цената може да се очекува, Малишиќ вели дека реално е неизвесно, затоа што во меѓувреме се смениле околносите за нивните пресметки за поевтинување на основната храна за 10 проценти.
– Кога ги правевме овие пресметки кои јавно неодамна и ги соопштивме, Путин не го сопре извозот на жито – вели Малишиќ.
Странските медиуми веќе известија дека Фјучерсите на пченицата на берзите скокнаа за повеќе од 5 проценти, а на пченката за над 2 проценти бидејќи повлекувањето на Русија од договорот за извоз преку Црното Море ја зголеми загриженоста за глобалните резерви.
Што се однесува пак до договорите кои веќе ги имаат нашите компании со трговците на слободниот пазар. Малишиќ вели дека ќе бидат ставени во мирување.
– Во самите договори со трговците ставивме одредба дека ако се донесе одлука на Влада за цена на струјата која ќе важи за нас, договорот ќе биде ставен во мирување. Во спротивно, ние би трпеле штети од еднострано раскинување на договорот – вели Малишиќ.
Владината одлука се однесува на компаниите кои што произведуваат основни прехранбени производи во кои спаѓаат производителите на масло за јадење, леб и пекарски производи, брашно, млеко и млечни производи, месната и живинарската индустрија. Во списокот на Владата има 200 компании.
