Францускиот претседател Емануел Макрон денес ги осуди ставовите на рускиот претседател Владимир Путин, обвинувајќи го дека е „на страната на војната“ и додавајќи дека оние кои верувале поинаку сега се самите одговорни за своите заблуди.

„Претседателот Путин е на страната на војната, а не на страната на мирот (…) и оние кои веруваа дека тој има желба за мир, се излажаа себеси“, рече Макрон на прес-конференцијата што ја одржа со полскиот премиер Доналд Туск во Нанси, пренесува „Фигаро“.

Денес, Туск и Макрон потпишаа договор за пријателство и зајакната соработка, а францускиот претседател го опиша „француско-полското пријателство“ како „срдечен сојуз“. Сличен договор веќе е потпишан меѓу Франција и Германија, Италија и Шпанија.

Францускиот претседател повтори дека „виталните интереси“ на Франција, врз основа на нејзината стратегија за нуклеарно одвраќање, се поврзани и со интересите на нејзините „главни партнери“ во Европа. „Од 60-тите години, со изјавите на генералот (Шарл) де Гол, европската димензија на оваа стратегија за одвраќање е потврдена и постојано ја потврдуваат сите мои претходници, а јас самиот го правев тоа“, потсети Макрон.

Тој изјави дека ќе оди во Украина во „соодветен момент“, но не прецизираше дали ќе биде присутен на самитот на европските лидери што се одржува овој викенд, јавува BFM TV. „Во вистинскиот момент, ќе одам таму (во Украина). Од многу разбирливи причини, ретко се зборува за тоа однапред“, рече Макрон.

Францускиот претседател Емануел Макрон денес го поздрави многу јасниот повик за безусловно 30-дневно примирје во Украина од страна на неговиот американски колега Доналд Трамп, додавајќи дека сите мора да работат без одложување за да се постигне таа цел.

„Украина веќе се согласи на такво примирје пред два месеци. Сега очекувам Русија да го стори истото“, објави Макрон на Платформа X.

Тој додаде дека доколку тоа не се случи, Франција, заедно со сите Европејци и во тесна соработка со САД, ќе биде подготвена решително да реагира, објави „Фигаро“.

Американскиот претседател Доналд Трамп вчера повика на 30-дневен безусловно примирје и рече дека разговорите со Русија и Украина ќе продолжат.

Тој најави дополнителни санкции доколку примирјето не се почитува. „Доколку прекинот на огнот не се почитува, САД и нивните партнери ќе воведат дополнителни санкции. Илјадници млади војници умираат секоја недела и сите треба да сакаат тоа да престане. Јас го сакам тоа, а го сакаат и Соединетите Американски Држави“, рече американскиот лидер.

Тој додаде дека, како претседател, ќе остане „посветен на обезбедување мир меѓу Русија и Украина, заедно со Европејците“ и дека тоа ќе биде траен мир. Тој, исто така, нагласи дека ова прекин на огнот на крајот мора да доведе до мировен договор. „Сето ова може да се направи многу брзо, а јас ќе бидам достапен во секое време доколку се потребни моите услуги“, рече Трамп.