Францускиот претседател Емануел Макрон утрово ќе се сретне со претставници на различни религии во Елисејската палата, во пресрет на демонстрациите против антисемитизмот и откако упати апел за национално единство, пренесува Еуроњуз.

„По повикот за национално единство и братство што го упати во своето писмо до францускиот народ, претседателот на Републиката денеска ќе ги прими претставниците на верските конфесии“, се вели во соопштението на палатата.

Засега нема информации кој точно би учествувал на средбата.

Во неделата, повеќе од 100.000 луѓе учествуваа на собирот против антисемитизмот, а уште 80.000 луѓе се приклучија на митинзите низ целата земја.

Тоа беше демонстрација на солидарност против антисемитизмот наспроти зголемувањето на бројот на непријателски дејствија против еврејскиот народ во Франција од почетокот на војната Израел-Хамас на 7 октомври.

Во писмото објавено во саботата од весникот Паризиен, Емануел Макрон изрази жалење за „неподносливото оживување на нескротливиот антисемитизам“ и рече дека „Франција во која нашите еврејски сограѓани се плашат не е Франција“.

Тој додаде: „Франција мора да остане обединета зад своите вредности, нејзиниот универзализам, обединета за себе, да го продолжи својот проект и да работи за мир и безбедност за сите на Блискиот Исток“.