Франција планира да ја признае палестинската држава во наредните месеци и тоа би можело да го стори уште на конференцијата на Обединетите нации посветена на решавање на конфликтот меѓу Израел и Палестинците, што ќе се одржи во јуни оваа година во Њујорк, изјави денеска францускиот претседател Емануел Макрон, според АФП.

„Мораме да тргнеме кон признавање (на палестинската држава) и тоа ќе го направиме во наредните месеци. На конференцијата на ОН би можеле да го финализираме меѓусебното признавање (на палестинската држава) и неколку други држави. Ќе го сториме тоа“, рече Макрон во интервју за ТВ Франс 5.

Франција долго време се залагаше за решение со две држави за израелско-палестинскиот конфликт, дури и по нападот врз Израел од страна на палестинските милитанти на Хамас на 7 октомври 2023 година.