Косово мора да биде подготвено да се соочи со безбедносните ризици бидејќи се уште е загрозено од Србија – вели министерот за одбрана на Косово, Ејуп Маќедонци.

Како што јави дописникот за МИА од Приштина, тој во вечерашното интервју за телевизијата Т7,  изјавил дека на безбедносен план „ништо не е исклучено“, сé додека Србија продолжува да го гледа Косово како дел од неа.

„Сé додека во Србија постои политичка волја Косово да се гледа како нејзин дел, ништо не е исклучено и сé додека недостасува волја на институциите, особено на политичкото раководство во Србија, да ги потпишат договорите во целост и сериозно да пристапат кон дијалогот, верувам дека опасноста не поминала. Затоа како држава мора да се подготвуваме не само да се соочиме со оваа опасност, туку и со сите опасности кои можат да му наштетат на територијалниот интегритет и уставниот поредок“, рече Маќедонци.

Државата, порача косовскиот министер за одбрана, е „подготвено да се соочи со сé“.

„Нашата армија е подготвена да се соочи со секаква опасност и закана по територијата на нашата земја“, изјави Маќедонци за Т7.