Зошто да биде едноставно, кога треба да биде комплицирано? Наместо само здруженијата што се именувани според бугарскиот цар Борис Трети и според бугарскиот терорист Ванчо Михајлов да добијат црвен картон како докажани соработници на фашизмот и нацизмот од Втората светска војна и во пропишаната законска постапка да бидат избришани од Централниот регистар, сега на проверка пред владината Комисија за употреба на имиња на личности ќе одат сите 17.000 регистрирани здруженија и фондации!

Како се стигна од потребата да се проверат и/ли да се избришат две здруженија до ситуацијата да мора да се проверуваат 17 илјади? Мајсторијата ја знае македонската влада, која дозволи така да се заплетка работата со двете спорни здруженија на македонските Бугари што сега, така заплеткана, може да се сопне или да не мрдне ниту чекор понатаму, а здруженијата именувани според фашисти да останат да ги провоцираат сите по ред во Македонија. Освен вљубениците во фашизмот, какви очигледно кај нас сè уште има!

И, уште еден непотребен доказ за големата вистина – ако нешто не сакаш да биде завршено, формирај комисија. Уште не ни почната да работи, Комисијата за употреба на имиња веднаш се преполови, откако двајца од петмина членови ја напуштија, а нови уште не се назначени. Едниот не сака да учествува во таква комисија оти по професија е уролог, а другиот замина од институцијата што го назначи, од Министерството за култура, па со тројца членови засега нема воопшто логика да се заседава. Комисијата, секако, нема рок во кој треба да ги прегледа сите досегашни 17.000 имиња и статути на здруженијата, но затоа рок има министерот за правда, кој најдоцна до 16 март врз основа на мислењето од Комисијата треба да донесе решение за неусогласеност на двете спорни бугарски здруженија, а Централниот регистар врз основа на тоа мислење да ги избрише. Но, рок има, ама министер за правда до вчера немаше, па иако сега новиот Кренар Лога веќе е на функција, останува неизвесно дали ќе стаса да ја заврши процедурата до крајниот рок – 16 март, што власта (СДСМ) и опозицијата ( ВМРО-ДПМНЕ) есеноска самите си го одредија со консензус! А најнеизвесно е – што ќе се случи ако пропадне рокот и ако Комисијата не стигне да ги разгледа сите 17.000 здруженија до 16 март или, пак, запне во одлуката со прогласување на тоа кој бил соработник на фашистите. А може да запне, затоа што е потребно процесот во кој ќе одлучува да биде транспарентен и научно издржан, особено затоа што веќе има најави за оспорување на одлуките и тоа од две страни – и од официјална Софија и од партиите со префикс ВМРО. Бугарија веќе во собраниска декларација стави дека ваквите одлуки ќе влијаеле на работата на една друга комисија, Мешовитата комисија за историски прашања, затоа што демек со прогласувањето на Михајлов и на Борис Трети за фашисти сме ги прејудицирале идните одлуки на Историската комисија, небаре во светот не се знае дека и царот и терористот, секој со свои мотиви, соработувале со фирерот и како да е можно каде било на планетава денес да се врши историска ревизија или рехабилитација на фашистичките соработници.

Се јавија и наследниците на Ванчо Михајлов, претседателите на ВМРО од денешно време, двајца поранешни премиери и еден потенцијален иден и сите тројца остро се спротивставија некој да им го прогласува Михајлов за фашист, оти – немало докази, а имало време во иднина тоа натенане да го проверуваат идните генерации! Па, како тогаш самата ВМРО-ДПМНЕ предложи законски измени во Собранието со кои нивен историски лидер ќе биде забранет и тоа како фашист? Некој од внатре им ја продава куќата, ама се преценила работата, па цената сега никому не му одговара?

Во македонската политика сè се има, сè се може, па во неограничените дневнополитички можности се дојде и до тоа сите граѓански организации да го поминат тестот за фашизам, од здруженијата на новинарите, на лекарите, за заштита на децата, за унапредување на чии било права, за екологијата, преку разни тематски, професионални или етнички здруженија, до Фондот на холокаустот, Еврејската заедница, а секако и Сојузот на борците од НОБ! Комисијата за имиња ќе проверува да не се скрил некаде фашизам во имињата и на здруженијата Пчелка, Ластовичка, Сонце, Кокичиња… И, што е најтрагично, целта на крајот може да остане неисполнета, односно граѓаните да бидат дополнително навредени и повредени, а фашистите да си останат незабранети.