Македонскиот културен клуб „Никола Вапцаров“ во Благоевград нема да се затвори, туку по една година постоење ќе се премести на друго место откако сопствениците неколку пати биле заплашени и не смеат да го продолжат договорот, соопшти ОМО Илинден Пирин по шпекулациите дека клубот се затвора.

„Сите членови на сите организации се канети и примани во клубот. За присуство во клубот и учество во неговите активности или организираните од него свечености од никого ништо не е барано. Бугарските власти вложуваат огромен напор да не дозволат да се отворат македонски клубови или да им се одземат просториите на оние што постојат. Во такви услови ширењето на навреди, дезинформации и полувистини само дополнително ја влошува и без тоа тешката борба на Македонците во Бугарија“, велат од ОМО „Илинден“ – Пирин.

Оттаму апелираат кон медиумите за повеќе професионализам и до сите Македонци да не веруваат на непроверени негативни информации.

Kлубот беше отворен лани, со засилено полициско обезбедување. Пред два месеци клубот беше демолиран, при што беа искршени стаклата.