Денеска во Охрид започнаа заедничките полициски патроли на македонски и српски полицајци.

Патролите се реализираат врз основа на потпишаниот Протокол за соработка во текот на летната и зимската туристичка сезона на двете Министерства за внатрешни работи, според кој е предвидено заедничко патролирање низ Охрид секојдневно во текот на летната сезона – од 21 јули до 31 август.

Според полицијата, со заедничките патроли им се излегува во пресрет на граѓаните „со цел задоволување на нивните потреби од безбедносен аспект како и обезбедување други сервисни потреби“.

Полицајците од Србија нема да имаат полициски овластувања и при реализација на полициската работа на терен ќе бидат обврзани да постапуваат во согласност со националното законодавство на РМ, нема да го носат службеното оружје и ќе даваат само поддршка на полициските службеници од Охрид.

Српските полицајци пред стапувањето на работната задача детално биле запознаени со законот за внатрешни работи на РМ и Законот за полиција, извести портпаролот на СВР Охрид, Стефан Димоски