Македонски фирми во соработка со владата во периодот што следи ќе донираат генератори, греалки и секаков друг вид на грејни тела на Украина за да може земјата да ја преброди зимата, по руските ракетни напади врз енергетската инфраструктура. Ова го соопшти украинскиот министер за надворешни работи Дмитро Кулеба кој истакна дека е благодарен на земјава за поддршката која ја дава за украинскиот народ во периоди кога се очекува значително намалување на темературите во воздухот.

Како што истакна Кулеба уикраинските дипломати периодов се во постојан контакт со своите партнери и вложуваат максимални напори Украинците да имаат светлина, топлина и вода во своите домови. 

– Веќе се договоривме за набавка на опрема од владите и компаниите на 12 земји меѓу кои се Израел, Шпанија, Италија, Литванија, Германија, Северна Македонија, Полска, Република Кореја, Словачка, Словенија, Финска и Франција. Севкупно, станува збор за 954 единици грејни тела и генератори за струја. Првите серии помош се веќе во Украина, а останатите се очекуваат во блиска иднина. Продолжуваме да работиме на зголемување на опсегот на партнери и нивната поддршката за Украина – рече тој.

Меѓу опремата што Украина ја добива се генератори за струја од различни типови, грејни тела како и електични и гасни затоплувачи на простории.

„Благодарни сме на секој партнер и секоја компанија што одговори на нашето итно барање. Украина секогаш ќе ги памети оние кои беа со нас во овој тежок период на искушенија“, заклучи шефот на Министерството за надворешни работи на Украина.