Иако не трошат како за основните прехранбени производи, Македонците издвојуваат сериозна сума за набавка на храна за своите миленичиња. Државниот завод за статистика сè уште не ја вброил оваа ставка во Анкетата за потрошувачката на домаќинствата, но експертите велат дека во последните години овој бизнис расте и доживеа вистински бум за време и веднаш по пандемијата, кога луѓето, барајќи внимание поради намалениот контакт, прибегнаа кон купување и посвојување миленичиња. Граѓаните за „Слободен печат“ велат дека доста се поскапени витамините, суплементите и храната што им е потребна нивните миленици.

– Поквалитетната храна за кучиња чини најмалку 600 денари за килограм, а трае максимум десетина дена. Оние што имаат поголеми раси кучиња трошат двојно повеќе. Треба да се напомене дека станува збор за рефус храна, додека пакуваната е многу поскапа. Исто така, мора да се води сметка за видот на кучето, бидејќи одредени раси не треба да се хранат со јадење што содржи житарки. Некои кучиња што имаат некакви проблеми со желудникот или, на пример, со коските, јадат само медицинска храна, приспособена за тие болести, која е уште поскапа. Интересно е што кучињата со бело влакно, пак, не треба да се хранат со оброк што содржи бета-каротин за да не им пожолти влакното. Ова е цела наука – вели Ане од Скопје.

– Понекогаш купувам конзервирана храна за моите мачиња и забележав дека тие се поскапени за најмалку 30 отсто, а поквалитетната сува храна е најмалку 400 денари килограм, додека, пак, пакуваните кутии не може да се најдат под 70 до 80 денари за 400 грама, што е солидна ставка на месечно ниво. Малечките мачиња треба почесто да се хранат, така што храната брзо се троши – додава Весна од Скопје.

Процените на глобалната платформа Статиста од Германија покажуваат дека годинава приходите на пазарот за храна за домашни миленици во земјава ќе надминат 32 милиони американски долари.

– Се очекува пазарот да расте годишно за 8,49 отсто до 2029 година. Во глобална споредба, најмногу приходи се генерираат во САД – 59,7 милиони американски долари во 2024 година. Пазарот за храна за домашни миленици се очекува да покаже раст на обемот од 6,7 отсто во 2025 година. Просечниот волумен по лице на пазарот за храна за домашни миленици се очекува да изнесува 10,2 килограми во 2024 година – пресметале експертите од Статиста. Најголемиот увоз на овој вид храна во Македонија доаѓа од Унгарија, Германија, Велика Британија, Полска и Србија.

Анализата на „Маркет паблишрс“ укажува дека во последните неколку години, многу производители ставаат поголем фокус на „чиста етикета“, природни состојки и врвен квалитет.

– Како што се стеснува јазот помеѓу храната за луѓе и домашни миленици, производителите на храна за домашни миленици сè повеќе ги следат човечките вкусови и потребите за исхрана. Друг доминантен тренд, кој влијае врз пазарот на храна за домашни миленици, е зголемената побарувачката за здрава храна со проактивни состојки. Пазарот во Македонија забележува пораст во број и разновидност на избори за храна за домашни миленици што го нагласува вклучувањето нутрициски производи состојки какви што се пробиотици, омега-3 масни киселини, витамини и многу повеќе. Во меѓувреме, на интересот за нови извори на протеини исто така станува поголем. Иако поголемиот дел од протеините изворите денес сè уште се засновани на месо, некои од производителите на храна за домашни миленици бараат нови извори на протеини и состојки – сугерираат од „Маркет паблишрс“.

Годишно во ЕУ се продаваат 10,5 милиони тони храна за миленици

Во Европа годишно се продаваат 10,5 милиони тони храна за домашни миленици, а се повеќе производители од Србија ја гледаат својата шанса да се испробаат во овој бизнис и да дизајнираат нови производи за овој пазар што брзо расте. Кучињата и мачките од дури 33 земји јадат храна произведена во српските фабрики, а локална компанија од Петровац на Млава дури неодамна, прва во Европа, почна да произведува сок за кучиња.

Според податоците на Трејд мап, вкупната вредност на извозот на храна за кучиња и мачки од Србија во 2022 година изнесувала 152,47 милиони американски долари, што е за околу 14 отсто повеќе од 2021 година. Првите десет земји во кои најмногу се извезувала српската храна за миленици се Руската Федерација, Италија, Полска, Турција, Грција, Чешка, САД, Франција, Словачка и Германија, а извозот е 33 пати повеќе отколку во истиот период 2022 година.

Пазари со најголем потенцијал за глобален извоз на храна за кучиња и мачки се Германија, САД и Обединетото Кралство, објави неодамна РТ Балкан. Анализата покажа дека речиси секое второ домаќинство во ЕУ (46 отсто) има едно или повеќе домашни миленичиња. Мачките, од кои има околу 127 милиони, се најпопуларни миленици во Европа со удел од 26 отсто, а потоа следуваат кучињата кои ги има во секое второ домаќинство. Овој пораст на бројот на домашни миленици се одразува на растот на пазарот на храна, кој во 2022 година порасна во вредност од 5,1 отсто и сега вреди 29,1 милијарди евра.