Во амфитеатарот на Меѓународниот славјански универзитет во Битола, по 19 пат беше врачена наградата за новинарство на Битолски весник „Тоде Петрески“. Годинава наградата што го носи името на починатиот новинар на Радио Скопје, Тоде Петрески ја доби новинарката Маја Богоевска.

Таа дваесет години е активна во новинарската професија и пред присутните порача дека крајно време е да се врати достоинството на новинарската професија во Битола.

-Голема чест е што ја добив наградата востановена во чест на доајенот на битолското и македонското новинарство Тоде Петрески. Јас, за жал немав можност лично да учам за новинарството од Тоде Петрески, но она што го слушав од колегите новинари кои што многу добро го познаваа, ја имам точната слика за него, дека беше синоним за храброст и вистински пример како еден новинар треба да се бори за вистината. За жал, сега сме сведоци дека полуписмени го „киднапираа“ новинарството и ја унаказија професијата новинар во Битола за свои лични интереси. Како новинар ќе се борам против манипулацијата со вистината која за жал е најголема во интернет просторот-изјави добитничката на наградата Маја Богоевска.

Директорот на Битолски весник, Менде Младеновски кој пред 19 години по смртта на Тоде Петрески ја востанови наградата за новинарство рече дека во времето кога Тоде Петрески беше новинар на Радио Скопје, беше задоволство и привилегија да се биде новинар во Битола.

-Денес новинарството во Битола се наоѓа на смртна постела. Никој повеќе се сака да биде новинар. Најголемиот број новинари станаа пи-ар службеници или го напуштија новинарството. За ваквата состојба покрај општествените услови најмногу се виновни новинарите кои станаа измеќари на политичките елити. Денес, политичарите имаат време за се и за сите, а најмалку имаат време за медиумите. Тоде Петрески беше новинар којшто новинарството го имаше сфатено како вечна борба. Тој остави длабоки траги во битолското и македонското новинарство-рече на доделувањето на наградата директорот на Битолски весник, Менде Младеновски.

Во името на семејството на Тоде Петрески на доделување на наградата се заблагодари неговата ќерка Даниела Петреска.

-Сакам да искажам голема благодарност до Битолски весник што ја воведе оваа награда посветена на мојот татко. Цели 19 години по смртта заедно со Битолски весник го зачувуваме споменот на мојот татко кој што целиот свој живот му го посвети на новинарството, професија во траење која трае и по пензионирањето на новинарите-рече Даниела Петреска, ќерка на Тоде Петревски.