Популарноста на телевизиските канали се чини дека е еден од главните фактори за функционерите во идната администрација во Вашингтон, покрај лојалноста кон победникот на претседателските избори, Доналд Трамп.

Ова го потврдуваат новите имиња што Трамп ги најавува за највисоките функции, кои треба да бидат одобрени од Конгресот откако новиот претседател ќе ја даде свечената заклетва на 20 јануари в година.

Министерството за образование нема да биде укинато, како што најавуваа републиканците во предизборната кампања, но за министерка за образование Трамп ја предложи Линда Мекмахон, соосновачот на Светското боречко шоу (ВВЕ). Мекмахон е успешна бизнисменка, но има скромно искуство на раководни функции – беше на челото на Администрацијата за мали бизниси во претходниот мандат на Трамп. Таа донираше милиони долари во неговата трета претседателска кампања, а по победата на Трамп беше назначена за сопретседателка на тимот за транзиција на власта.

– Мекмахон ќе го користи своето повеќедецениско лидерско искуство и длабокото разбирање и на образованието и на бизнисот за да ѝ даде моќ на идната генерација американски ученици и работници – порача Трамп, објавувајќи ја номинацијата.

Мекмахон во 2009 година ја напушти директорската функција во популарното боречко шоу за да се кандира за сенаторка, но беше поразена во трката. Токму во тој период таа две години беше членка на одборот за образование во сојузната држава Конектикат, а сега е членка на одборот на аналитичкиот институт Америка фрст полиси, наклонет кон политиката МАГА (Да ја направиме Америка повторно велика!) на Трамп.

Само неколку часови претходно идниот претседател го назначи контроверзниот лекар и шоумен Мехмет Џенгиз Оз, попознат како Доктор Оз, да биде на челото на Центрите за здравствено осигурување Медикер и Медикејд, кои покриваат 150 милиони граѓани и во кои во текот на 2023 година федералните власти потрошија повеќе од 1.400 милијарди долари.

Овој фонд се очекува да биде значително скратен од новоформираната агенција за кастрење трошоци и бирократија на чело со милијардерите Илон Маск и Вивек Рамасвани.

Оз повеќе се прослави како шоумен отколку како кардиоторакален хирург. Тој честопати беше критикуван од колегите лекари кога како водител на „Шоуто на доктор Оз“ пред две децении нудеше контроверзни „чудесни лекови“ за разни болести. Во почетокот на пандемијата на ковид-19, Оз на пациентите им препорачуваше лекови против маларија. На сослушување пред комитет на Сенатот во 2014 година тој се бранеше од обвинувањата дека препорачувал лекови со непотврдено дејство, за кои кажувал дека „буквално ги исфрлаат мастите од стомакот“.

– Можеби нема лекар поквалификуван и поспособен од доктор Оз за да ја направиме Америка повторно здрава – порача Трамп.

Како шеф на здравственото осигурување, Оз тесно ќе соработува со Роберт Кенеди Јуниор, кој веќе беше номиниран за министер за здравство и благосостојба, иако важи за голем противник на кампањите за вакцинирање.

Телевизиска ѕвезда е и Пит Хегсет, кој од телевизиски презентер и коментатор е прекомандуван да биде шеф на Пентагон. Тој е ветеран што бил на позиции во Гвантанамо Беј на Куба, како и на воена служба во Ирак и Авганистан, но нема раководно искуство во цивилна служба. Како телевизиски водител тој стана популарен поради критиките на демократскиот систем и на партнерите на САД од НАТО, а отворено повикуваше на „крстоносен поход против радикалниот исламизам“.

Од омилената телевизиска станица на Трамп се и Томас Хоман, кој ќе биде шеф за контрола на границите, како и Мајкл Волц, кој ќе биде советник за национална безбедност. Кандидатот за јавен обвинител Мат Гец, пак, гостувал на телевизијата „Фокс њуз“ повеќе од 300 пати во изминатите седум години.

Заеднички именител на сите овие кандидати е што досега му беа лојални на Трамп, особено во четирите години меѓу двата мандата во Белата куќа, во кои упорно тврдеше дека му била украдена победата на изборите во 2020 година и дека судските процеси против него се „лов на вештерки“.