Венецуелскиот претседател Николас Мадуро денес ги повика граѓаните кои се приклучија на Боливарската милиција во последните две недели да одговорат на „првото активирање“ за одбрана на земјата.

„Ќе го одржиме првото активирање на сите оние кои се пријавија, целата Национална милиција и резервистите, за учество во голема организациска и мобилизациска акција на силите, за прв пат во воената историја на земјата“, рече Мадуро, според Си-ен- ен на шпански.

Мадуро рече дека целта на мобилизацијата е да се вклучат 8,2 милиони луѓе, според бројките што ги даде, и додаде дека кампањата за регрутирање сега ќе биде трајна.

„Вие, венецуелски граѓани, вие, граѓани, сакани сонародници кои ја сакате оваа земја и сте подготвени да ја браните, заради вашето семејство, заедница, историја и достоинство, сега имате постојан пристап до системот Патрија“, нагласи Мадуро.

Повикот дојде во време на зголемени тензии меѓу Венецуела и САД, откако Вашингтон во вторникот објави дека уништил наводен брод за шверц на дрога кој ја напуштил венецуелската територија и се движел низ карипските води.

Претходно, САД објавија распоредување воени бродови во Карипското Море како дел од операциите против трговијата со дрога, што Каракас го смета за закана, пренесува Танјуг.

Како одговор, властите упатија повик до граѓаните да се приклучат на Боливарската милиција. Оваа резервна формација е основана во 2005 година, под претседателот Уго Чавез, под името Генерална команда на националните резерви и национална мобилизација, а во 2009 година е преименувана во Боливарска милиција.