Венецуелскиот претседател Николас Мадуро најави распоредување на повеќе од 4,5 милиони членови на милицијата низ целата земја како одговор на „заканите“ од САД.

Овој потег дојде откако САД ја удвоија наградата за неговото апсење на 50 милиони долари, објави Анса.

Мадуро изјави на државната телевизија дека ќе активира „специјален план“ што вклучува обука, вооружување и активирање на милициите за да се обезбеди покриеност на целата венецуелска територија.

„Милициите се обучени, активирани и вооружени“, нагласи претседателот на Венецуела. Венецуелската милиција, основана од поранешниот претседател Уго Чавез, се состои од околу пет милиони луѓе, вклучувајќи цивили и резервисти, и е под директна команда на војската.

Мадуро реагираше на последните потези на Вашингтон, нарекувајќи ги „валкано повторување на заканите“ и велејќи дека ќе бидат опремени со „ракети и оружје“ за да го одбранат суверенитетот на Венецуела.

Изјавата на Мадуро дојде откако американскиот државен секретар Марко Рубио го потврди распоредувањето на поморски и воздухопловни сили во Карибите за операција против дрога, кратко откако САД ја зголемија наградата за Мадуро, кој е обвинет дека е член на меѓународен нарко картел.