Американската агенција за односи со јавноста и маркетинг „Дашл груп“, со која Скопје и ВМРО-ДПМНЕ имаат официјален договор од 2015 година, го поканила македонскиот премиер Христијан Мицкоски во Вашингтон, а не новоизбраниот американски претседател Доналд Трамп, објави бугарскиот портал „Лупа“, (lupa.bg), повикувајќи се на „добро информирани дипломатски извори“.

„Посетата на македонскиот премиер е од приватен карактер. Затоа, тој нема да присуствува на официјалната церемонија на инаугурација на Трамп. Тој ќе биде приватно лице во широкиот круг на присутни, во кој ќе има новинари од Бугарија и јавни личности од целиот свет“, пишува бугарскиот медиум.

Министерот за надворешни работи и надворешна трговија на Северна Македонија, Тимчо Муцунски, пред неколку дена најави дека ќе биде дел од делегацијата предводена од премиерот на земјата, Христијан Мицкоски, која на 18 јануари заминува за Вашингтон.

„Доаѓањето на новата американска администрација дефинитивно е значаен настан за нас. Мицкоски ќе ја предводи нашата делегација таму и заедно со него ќе учествуваме на многу официјални и неформални настани кои се дел од овој процес на инаугурација на претседателот. Имаме напорен распоред на состаноци, да ги зацврстиме нашите позиции со идната администрација, да продолжиме да ги негуваме добрите и лични односи што ги имаме. Да го потврдиме и континуитетот што го очекуваме од американската надворешна политика, во однос на прашањата поврзани со регионот, посветеноста на европската интеграција, посветеноста на НАТО и сè што ни е важно од перспектива на „европската и регионалната безбедност и прашања кои најмногу не засегаат како држава“, изјави Муцунски во интервју за „Телма“.

Според извори на „Лупа“, и бугарскиот претседател Румен Радев не добил покана за инаугурацијата на Доналд Трамп. Покани немаат ниту претседателката на Бугарското народно собрание Наталија Киселова, новиот премиер Росен Жељазков и министерот за надворешни работи Георг Георгиев, се вели во текстот.

Поканетите гости од Европа се исклучително малку и голема е веројатноста да нема официјално лице од Бугарија. Од друга страна, претставниците на светската бизнис-елита ќе имаат место на гламурозниот настан, пишува „Лупа“.