Субвенции за придонесите досега искористиле 8.000 работодавачи кај 45.000 вработени, а пак 1.300 работодавачи за 47.000 работници не го сториле тоа поради технички грешки.

На денешната прес-конференција директорката на УЈП, Сања Лукаревска ги објави податоците за тоа дали компаниите започнале да се пријавуваат за субвенции за придонеси, поради тоа што на 15 декември истече рокот за исплата на ноемвриската плата.

– Имаме податок дека досега 8.000 работодавачи овозможиле кај 45.000 вработени да си го остварат правото на субвенционирање. Додека 1.300 работодавачи за 47.000 работници се уште не го оствариле правото да субвенционирање, поради тоа што станува збор за одредени технички грешки кои што очекуваме дека ќе се надминат во наредниот период. Значи станува збор за 58 милиони денари, затоа што за месеците октомври и ноември се направени одредени исправки, а декември е се уште во тек и до крајот на годината ќе го имаме и тој податок – рече директорката на Управата за јавни приходи, Сања Лукаревска.