Платформата за предвидување базирана врз криптовалути, „Полимаркет“ нуди можности за обложување околу катастрофалниот пожар кој беснее во Лос Анџелес, пренесува „Бизнис инсајдер“.

Платформата е позната по тоа што им нуди на корисниците да користат криптовалути за обложување на секакви случувања и процеси.

Ваквиот пристап често наидува на критики и отвора етички дилеми, а по последниот случај, на социјалните мрежи можеа да се прочитаат многу коментари дека нормализирањето на забавата и обложувањето на човечката несреќа зборува многу за состојбата на денешното општество.

На платформата, која Франција размислува да ја забрани, корисниците сега имаат можност да се обложуваат на различни сценарија во врска со пожарите во Лос Анџелес – колку вкупно хектари ќе бидат зафатени, кога пожарот целосно ќе биде ставен под контрола, па дури и за тоа дали огнената стихија во следните денови ќе се прошири до соседниот град Санта Моника.