Околу 14.000 млади луѓе од целиот свет преку агенции доаѓаат да чуваат деца во Германија. Меѓутоа, во некои случаи тоа се претвора во експлоатација. Звучи толку неверојатно примамливо: да се биде млад и да се впушти во авантура наречена: Германија. А можеби дури и да останете во Германија, да продолжите со образованието таму или да се запишете на факултет, пишува Дојче веле.

За многу млади луѓе од целиот свет, таквата надеж е реалност. Но, ако некој нема среќа, се може да биде сосема поинаку. Како што и се случи на Ана да Силва од Бразил. Таа всушност носи друго име, сака да остане анонимна. Таа дојде во Германија на крајот на минатата година и за само неколку месеци помина забрзан курс за лошите страни на чувањето деца. Бразилката за ДВ изјави дека морала да работи многу повеќе од договорените 30 часа неделно. Работела најмногу како чистачка, а не како дадилка. Количината на храна која ја добивала била строго ограничена, а често, како што вели, и давале само парче леб. Кога се пожалила на условите за работа почнале да и се закануваат дека ќе ѝ дадат отказ.

Таа го користи терминот „модерно ропство“ за она што го доживеала и вели: „Бев во пет семејства, секое полошо од другото. Во Германија немаат поим што се случува со оние кои учествуваат во такви програми, тоа е лудост. Никој не ти помага, немаш ништо.“ Таа сега јавно го објави своето искуство, бидејќи сака да ги предупреди младите дека и во земја како Германија има експлоатација. Не сите агенции кои вработуваат дадилки се лоши, но од 2002 година доволна е едноставна деловна лиценца за отворање агенција. Многу девојки од Колумбија, Индонезија и Киргистан (трите земји со најмногу издадени визи во 2022 година) избираат полесен начин: преку групи на социјалните мрежи или на онлајн платформа специјализирана за медијација, а потоа се соочуваат со проблеми, пренесува ДВ.