Не е прв пат Метрополитенската полиција во Лондон да биде повикана да се справи со скандал. Само пред две години беше спроведена истрага за Скотланд Јард, позната и како Метрополитенска полиција, која ја дефинираше како „институционално расистичка, хомофобична и сексистичка“.

Овие наоди дури и предизвикаа оставка на поранешната полициска комесарка Кресида Дик, која објави дека ја напушта својата позиција по пет години во неа.

Сега, уште еден случај излезе на виделина. По истрагата на британската мрежа Би-Би-Си , полицијата суспендираше 9 полицајци и ги упати на комитетот за полициска етика.

Истрагата се спроведе во полициската станица Черинг Крос, една од најцентралните локации во британскиот главен град. Според обвинувањата, кои ќе бидат детално објаснети во претстојниот документарец на Би-Би-Си Панорама, полицајците се обвинети за прекумерна употреба на сила, давање пристрасни и мизогинистички коментари и несоочување или непријавување на несоодветно однесување од страна на нивните колеги.

Независната канцеларија за полициско однесување во Англија и Велс (IOPC) соопшти дека помага во истрагата, во која се вклучени девет активни полицајци од Метрополитенската полиција, еден поранешен полицаец и еден кој работи во службата за притвор.

Инцидентите се случиле и за време и надвор од должност помеѓу август 2024 и јануари 2025 година.

Реакциите на вклучените

Директорката на независната Канцеларија за полициско однесување, Аманда Роу, изјави за Би-Би-Си дека „ова се загрижувачки обвинувања во кои се вклучени голем број луѓе и ние ја разбираме загриженоста на јавноста, бидејќи претходна истрага за слични обвинувања е спроведена повторно за истата полициска станица“.

Важно е да се напомене дека Канцеларијата во 2022 година имала слични наоди за оваа полициска станица, вклучително и хомофобичен, расистички и мизогинистички групен разговор на платформата WhatsApp, една од најпопуларните страници за социјално вмрежување.

Помошникот комесар на Метрополитенската полиција, Мет Твист, ги нарече овие однесувања „срамни“, додавајќи дека „полицијата презема итни мерки за отстранување на тимот за апсење и притвор на оваа станица, како и нејзиното раководство, како и командантите на пошироката област на Вестминстер“.