Тајната развојна дивизија на „Локид Мартин“, позната како „Сканк Воркс“, го најави својот најнов проект  автономен стелт дрон наречен „Вектис“. Компанијата очекува првиот тест-лет да се реализира до крајот на 2027 година, јави „Брејкинг Дифенс“.

Според потпретседателот на „Сканк Воркс“, О.Ј. Санчез, „Вектис“ припаѓа на највисоката категорија на беспилотни летала („Категорија 5“) и е замислен како голем дрон со повеќекратна употреба, прилагодлив за динамичните закани на идното бојно поле.

Широк спектар на мисии

„Вектис“ е дизајниран да покрие повеќе типови операции – од воздух-воздух и воздух-земја борба, до извидување и надзор (ISR). Благодарение на архитектурата на отворени системи, може да се интегрира и со платформи надвор од производството на „Локид Мартин“.

Дронoт овозможува модуларни прилагодувања капацитет за носивост, оперативни сценарија, лесно складирање и брза склопливост, зависно од барањата на клиентот.

„Флексибилноста е вградена во дизајнот“, истакна Санчез.

Обвиен во тајност

Како и кај другите проекти на „Сканк Воркс“, дел од клучните технички карактеристики како моторите или максималната брзина остануваат тајна. Сепак, компанијата нагласува дека суперсонична брзина не е услов за вакви мисии.

Во сегашната конфигурација, „Вектис“ користи писта за полетување и слетување, а конструкцијата е направена од издржливи материјали со лесен пристап до внатрешните системи за одржување.

Компатибилност со авиони од новата генерација

Иако дронот сè уште не извршил реален лет, симулациите и оперативните анализи го поврзуваат со ловците Ф-22 и Ф-35. Според „Локид“, неговиот радарски потпис и комуникациска архитектура се компатибилни со авијацијата од петтата и идната шеста генерација.

Дизајнот на „Вектис“ се потпира врз претходните експерименти на компанијата и прототипите за авионите на иднината, што дополнително ја зголемува неговата стратешка вредност.