ЛОИ Париз 2024: Македонскиот тим втор најмалуброен од балканските земји
Македонскиот тим на ЛОИ Париз ќе брои седуммина спортисти. Од балканските земји со кои природно се споредуваме, само БиХ има помалку претставници. Словенија, слична со Македонија по бројот на жители, ќе има дури 90 спортисти, Србија ќе биде претставувана од 112 спортисти, Црна Гора ќе има речиси трипати повеќе претставници од Македонија (19), Косово ќе биде претставено од деветмина спортисти…
Македонија ќе има втор најмалуброен олимписки тим од сите балкански земји на претстојните Олимписки игри во Париз 2024 (26 јули – 11 август). Македонскиот тим ќе брои само седуммина спортисти, колку што е познато засега. Засега, само Босна и Херцеговина има помалку спортисти од Македонија, од балканските земји. Сите други имаат повеќе, некои и многу повеќе.
Препорачано
Поразителен факт за Македонија како држава и за македонскиот спорт е што поголем број наши спортисти не постигнаа резултати во предолимпискиот период што би ги квалификувале за настап на ЛОИ Париз 2024.
За оваа состојба најмалку треба да се обвинуваат македонските спортисти затоа што тие не се виновни. Пред се, виновни се институциите на сите нивоа во земјава, затоа што со години го запоставуваат и го злоупотребуваат спортот и спортистите.
За да биде работата полоша…
За да биде работата полоша, во нашиот тим ќе има само еден спортист со олимписка А-норма, а тоа е борачот Владимир Егоров, кој е натурализиран, а по потекло е од Русија. И тој со игра на околностите доби А-норма. Имено, по одлуките на ИОК во врска со спортистите од Русија и Белорусија, Обединетото светско борење го известило Македонскиот олимписки комитет дека Егоров како највисоко рангиран борач од квалификациите во Азербејџан ќе може да настапи со А-норма. Да не беше ситуацијата со Русија и Белорусија, тој немаше да настапи на Игрите.
Сите други македонски спортисти учество обезбедија, не со постигната олимписка норма, туку по други основи. Инаку, другите наши претставници се атлетичарот Дарио Ивановски, џудистот Еди Шерифовски, теквондистката Милијана Рељиќ, стрелачката Анастасија Мојсовска и пливачите Ева Петровска и Никола Ѓуретановиќ. За претставник во екипен спорт не станува ни збор, Македонија никогаш немала претставник во екипните спортови на олимписки игри.
Ако се погледне ситуацијата со другите земји од регионов, со едноставна споредба ќе стане јасно колку заостануваме во спортот воопшто.
Споредба болна за нашиот спорт
Словенија, земја со која се споредуваме поради сличниот број жители, ќе има дури 90 спортисти на терените на ЛОИ Париз. Земјата со која порано живеевме заедно во државна заедница, ќе има претставници дури во два екипни спорта, ракомет (мажи и жени) и одбојка (мажи).
Србија, земја со сличен стандард како нашиот, ќе има дури 112 спортисти кои ќе ја претставуваат на ЛОИ 2024. Србија вројатно е најбројната балканска нација на ЛОИ Париз 2024. Србите ќе имаат три тимски спорта, кошарка (мажи и жени, 3х3 мажи), одбојка (мажи и жени) и ватерполо (мажи).
Црна Гора, земја која е многу помала од Македонија според бројот на населението, ќе има дури 19 спортисти меѓу кои и претставници во еден екипен спорт, а тоа е ватерполо (мажи).
Хрватска, земја која има отприлика двојно повеќе жители од Македонија, ќе има многукратно повеќе спортисти на ЛОИ споредено со нашава земја. Хрватите ќе бидат претставени со 75 спортисти. Хрватска меѓу другото ќе има претставници на турнирите во ракомет (мажи) и ватерполо (мажи).
Албанија ќе има осумминаа спортисти, Бугарија 47 олимписки спортисти, Грција ќе биде претставена со 101 спортист, Косово ќе има деветмина кои ќе се борат за олимписки резултати, ќе има и 107 романски односно 102 турски претставници на борилиштата во Париз 2024…
