Во темнината пишуваат законски измени за да го уништат правосудниот систем, во светлината држат предавања за правдата. O TEMPORA, O MORES! Ваков статус на фејсбук објави денеска министерот за правда Кренар Лога, а како хаштаг ознаки стави „професорка“, „правда“ и „Македонија“.

Со овој статус тој ѝ одговара не неговата претходничка професорката Рената Дескоска и практично ѝ сугерира на јавноста дека токму Дескоска е автор на скандалозните измени на Кривичниот законик со кои поранешните функционери на ВМРО-ДПМНЕ се спасија од кривичен прогон во предметите за висока корупција што ги отвори поранешното СЈО.
Јавноста до денес не дозна кој е автор на спорните измени на КЗ, заради кои, меѓудругото, Македонија доби лоши оценки во Извштајот на ЕК за напредокот во еврореформите. Лога изјавуваше дека тој не се согласил со таквоте измени, кои во Собранието ги протурка неговата заменичка Викторија Аврамовска Мадиќ. Таа, пак, не се изјасни кој ги напиша измените со кои се намалија казните за злосторничко здружување и за злоупотреба на службената положба и се укина ставот за злоупотреба при јавните набавки, а во една прилика даде лажна изјава на медиум кој ѝ побарал информација за авторите врз основа на Законот за слободен пристап до информациите. Мадиќ тогаш одговори дека автори се членовите на работната група кои го подготвуваат новиот КЗ, што тие го демантираа. Мадиќ го повлече исказот, но никогаш не одговори кој ги напишал измените на КЗ.

Според сугестијата на Лога дека „во темнината пишуваат законски измени за да го уништат правосудниот систем, во светлината држат предавања за правдата“, автор може да е професорката Дескоска, поранешна министерка за правда.

Дескоска утрово напиша:

„ Седи, кец. Извештајот на ЕУ за напредокот на секоја земја кандидат за членство е „сведителство“ со оценки за институциите. Делот на извештајот за #судство во најголем дел е оценка за работата на Министерството за правда и Судскиот совет во изминатата година. А таа оценка, никој немаме дилеми дека е објективна. Таа најреално зборува за нашите успеси и неуспеси, а не како ние се гледаме во огледало или како нашите претходници, следбеници или политички конкуренти не гледаат или оценуваат нас. Јас искрено посакувам секој нареден извештај да е подобар од претходниот, или барем да покажува дека има одреден напредок, дека нема застој во реформите, дека одиме напред. За жал, тоа не е случај во делот на судството.

Ако ги споредиме извештаите од 2019 година до денес можеме да ги прочитаме следните оценки за реформите во судството:

2019 година – добар напредок

2020 година – добар напредок

2021 година – одреден напредок

2022 година – одреден напредок

2023 година – нема напредок.

Ова треба да го вклучи алармот во Министерството за правда и Судскиот совет за преиспитување на својата улога во надминување на состојбите. И барањето на решенијата не треба да биде во стилот на “префрлање на топката на одговорност”. Таа веќе падна пред нив и направи толкав кратер во кој може да се излизга целата земја.

Извештајот на ЕУ за (не)напредокот Ви ја покажа вистинската, грдата “слика на Доријан Греј”. Не вртете го погледот од неа, со тоа таа нема да исчезне.

Наместо тоа, наместо префрлање на одговорност и негирање на реалноста, оставете ги суетите на страна, бидете свесни дека во оваа област “битката за ситни политички поени” собрани преку јавни препукувања и надмудрувања може да биде фатална (како што и веќе се покажува дека е) и соберете ги сите интелектуални капацитети за да се најде излез од оваа ситуација. Граѓаните го очекуваат тоа!