Јавни, пишувани и телефонски покани и повици прати министерот за правда Кренар Лога до ВМРО-ДПМНЕ за опозициската партија да делегира свој претставник во работната група за подготовка на новиот Изборен законик. Лога не се откажува од ставот новата изборна регулатива да биде донесена во согласност од сите партии.

Од ВМРО-ДПМНЕ тврдат дека не добиле покана и чекаат владините партнери да се изјаснат за предлогот Македонија да биде една изборна единица, наместо шест. И по тридневната конференција на американскиот Националниот демократски институт (НДИ) за изборните реформи, партиите не се усогласија за промена на изборниот модел.

„Телефонски го побарав координаторот на пратеничката група на ВМРО-ДПМНЕ Никола Мицевски за да добијам потврда дали ќе делегираат свој претставник во работната група за новиот Изборен законик, но тој не се јави. Му пишав и порака дека вратата кај мене им е отворена. Ќе пратам и уште едно писмо до координаторот и до претседателот на ВМРО-ДПМНЕ Христијан Мицкоски со предлог нивен член да биде претседател на работната група. Ако треба ќе појдам и во „Белата палата“.  Не се откажувам од намерата опозициската партија да биде дел од работното тело, бидејќи Изборниот законик треба да се донесе со консензус“, ни изјави министерот Лога.

Од ВМРО-ДПМНЕ велат дека освен јавниот апел за учество, од министерот не добиле писмена покана.

„Заклучоците на НДИ не ја содржат понудата од Владата и од Министерството за правда. Заклучоците, всушност, се забелешките од ОБСЕ содржани во нивните извештаи, кои за нас се прифатливи. Што се однесува до понудата на Министерство за правда за измени на Изборниот законик и за учество во работните групи, добро е прво да се чуе ставот на владината коалиција за една изборна единица и дали конечно ќе постигнат консензус за ова прашање“, велат од ВМРО-ДПМНЕ.

Лога вели дека е важно да се конституира работната група и прво да ги имплементираат препораките од ОБСЕ и ОДИХР за Изборниот законик, како и прашањата за кои има согласност од сите партии. Ако партиите се усогласат во Изборниот законик ќе се имплементира и промената на изборниот модел и отворените листи. Лога е оптимист дека процесот ќе биде сеопфатен, дека ќе се постигне консензус за новиот Изборен законик и дека на следните парламентарни избори партиите ќе се тркаат според новите изборни правила.

По тридневната дебата под покровителство на НДИ за подобрување на изборното законодавство, партии се усогласиле во најкус временски период, Министерството за правда да подготви официјален пречистен текст на Изборниот законик, кој ќе претставува појдовна точка за натамошни разговори околу потенцијални измени и дополнувања.

Партиите се согласиле да почне дискусија за воведување отворени листи за избор на општински советници за следните локални избори во 2025 година, да обезбедат родова еднаквост на листите за избор на пратеници и советници, во сооднос 50:50 и да почнат расправа за ревидирање на постојниот начин на избор на пратеници од дијаспората.
Според Павле Трајанов од Демократски сојуз, Изборниот закон го кочат СДСМ и ДУИ, бидејќи не можат да се усогласат за изборните единици. СДСМ е за една изборна единица, ДУИ смета дека треба да останат шест или да има најмалку три изборни единици. Интегративците ќе поддржат една изборна единица, но со праг од 5 отсто, што е неприфатливо за помалите партии. Алијанса за Албанците смета дека треба да има осум изборни единици, колку што има планските региони, додека Беса е за три изборни единици. Партијата за движење на Турците бара да се формира посебна изборна единица на помалите етнички заедници што би се натпреварувале меѓусебно.

„Од оваа изборна единица ќе се избираат пратеници само тие што ќе го поминат прагот, односно под услов да биде освоен одреден минимум број гласови“, велат од партијата.