Канадскиот премиер Џастин Трудо (51) и поранешната телевизиска водителка Софи Грегоар Трудо (48) ја изненадија јавноста со неочекуваната објава дека решиле да стават крај на нивниот 18-годишен брак.

„Како и досега, ние остануваме блиско семејство, поврзано со длабока љубов и почит еден кон друг за сето она што го изградивме и ќе продолжиме да го градиме“, напиша Џастин Трудо во изјавата објавена на неговиот инстаграм-профил.

Џастин и Софи Трудо се познаваат уште од детството, кога тој одел на училиште заедно со нејзиниот брат Мајкл. Сепак, тие не се познавале добро сѐ до 2003 година, кога повторно почнале да се дружат.

Но, интересно е дека Џастин прво го игнорирал нејзиниот мејл, во кој таа му пишала дека ѝ е драго што повторно го обновиле познанството. Неколку месеци подоцна, тие повторно се сретнале и Џастин ѝ го побарал телефонскиот број, а таа се однесувала како да не ѝ премногу драго за тоа, велејќи му дека би можел да ја исконтактира ако ѝ ја сочувал мејл адресата. Потоа тој ѝ пишал, а таа прифатила да излезат на романтичен состанок.

Канадскиот премиер подоцна објаснил дека причината поради која ја игнорирал нејзината порака е бидејќи не бил спремен за романтична врска во тој момент, но кога случајно се сретнале неколку месеци подоцна – тој знаел дека тоа е судбина.

Џастин ја запросил Софи на 18 октомври 2004 година, а се венчале на 28 мај 2005 година. Нивната свадбена прослава не била типична – Софи не носела бела венчаница, а немале ни свадбена торта. Во една прилика, поранешната водителка објаснила дека сакала „нешто поинакво“, па гостите ги послужиле со различни десерти, чај и кафе.

Низ годините, двојката отворено ја искажуваше љубовта, која тие ја чувствуваа еден за друг. Според Софи, „отвореното искажување емоции е секси“.

„Ти си мојата поддршка, мојата партнерка и мојата најдобра пријателка. Не постои друга личност со која би сакал да сум на ова патување“, напиша премиерот на нивната 15-годишнина од бракот.

Двојката има три деца – синот Хавиер Џејмс (15), ќерката Ела-Грејс Маргарет (14) и синот Хадриен (9).