Легендарниот Сер Алекс Фергусон ќе остане запаметен како еден од најдобрите тренери во историјата на фудбалот, но сега Гери Линекер смета дека славниот шкотски стратег има дел од вината за очајните резултати на Манчестер јунајтед во овој период.

Последната титула Манчестер јунајтед ја освои во 2013 година кога Фергусон беше на клупата, а со неговото повлекување започна и падот на гигантот од „Олд Трафорд“ кој денес поминува веројатно низ најлошиот период во својата историја.

„Кога ќе го погледнеме Ливерпул можеме да видиме дека успехот е тестамет на тоа што го остави Јирген Клоп. Со Фергусон во Манчестер јунајтед тоа не е случај. Тие ја освоија титулата во неговата последна сезона, но многу фудбалери од тој тим беа на крајот на кариерата. Мислам дека уште од тој момент почнаа да се појавуваат проблемите кои клубот ги има и денес“, изјави Линекер.

Манчестер јунајтед во овој момент се наоѓа на 14. место на табелата со само 33 бода по 27 одиграни кола.