Лидерите на партиите да ја понесат најголемата одговорност во новата влада, бил клучниот принцип на владеење на кој инсистирал претседателот на ВМРО-ДПМНЕ Христијан Мицкоски на средбата со претседателите од коалицијата „Вреди“ – Изет Меџити, Арбен Таравари, Африм Гаши и Билал Касами, брифираат за „Слободен печат“ учесници во преговорите за новата влада.

Од „Вреди“ се согласиле за принципот на владеење, бидејќи и тие сметаат дека најголемиот товар и одговорност во новата влада треба да ја понесат претседателите на партиите.
Ова во практика ќе значи дека освен Мицкоски како иден премиер, одговорност за владата ќе треба да преземат и лидерите од „Вреди“, односно да бидат на раководни функции, а не мандатите да ги поминат како пратеници во Собранието. Сепак, ако „Вреди“ биде владин партнер, товарот на владеењето нема да падне врз грбот на сите лидери од албанската коалиција, особено не врз актуелните градоначалници на Тетово и на Гостивар, Билал Касами и Арбен Таравари. Таравари не е на листите на пратеници, бидејќи беше претседателски кандидат, а и самиот веќе изјави дека не е заинтересиран за министерска позиција.
Од преговорите ќе биде појасно дали Таравари ќе остане надвор од принципот за кој се залага Мицкоски. Касами, пак, се очекува, откако ќе му биде верификуван пратеничкиот мандат, да го врати за да продолжи како градоначалник на Тетово.

– Тетовци покажаа дека мене ме чека многу работа во Тетово, работи што веќе се отворени и треба да се продолжат со одговорност. Ова битка не беше лично моја, туку беше битка на Албанците за да им се врати достоинството – изјави неодамна Касами.

Ова ќе значи дека товарот на владеењето ќе го понесат Меџити и Гаши. „Вреди“ веќе потврди дека ја бара функцијата претседател на Собранието. Неофицијално, ако ВМРО-ДПМНЕ го отстапи спикерското столче во парламентот на „Вреди“, што е малку веројатно, тогаш за прв парламентарец се споменува Африм Гаши. Меџити, пак, се споменува за вицепремиер за политички систем.

Неофицијално, со инсистирање на принципот на владеење се праќа и политичка порака до ДУИ, зашто претседателот на интегративците Али Ахмети, иако 20 години е во власта ниту еднаш не прифатил извршна функција, односно власта ја практикуваше како пратеник, без можност да биде повикан на одговорност за владеењето.

Од друга страна, ВМРО-ДПМНЕ смета дека тие треба да раководат со функцијата претседател на Собранието бидејќи имаат 58 мандати, наспроти 13 на коалицијата „Вреди“. Неофицијално за нов претседател на Собранието се споменува Никола Мицевски, досегашен координатор на пратеничката група на ВМРО-ДПМНЕ.

Инаку, вчера попладне продолжија разговорите помеѓу ВМРО-ДПМНЕ и „Вреди“, откако се екипираа работните групи. На првиот состанок се очекуваше работните групи да ја дефинираат динамиката и методологијата на работа, да се определат областите и да почнат разговори за усогласување на програмата на идната влада. Пред почетокот на состанокот, одговарајќи на новинарски прашања, Азир Алиу рече дека најверојатно од наредниот состанок на работните групи ќе почнат поконкретните разговори, вклучувајќи ги и кадровските решенија.

Тимот на ВМРО-ДПМНЕ е на потпретседателско ниво, односно преговорите ќе ги водат Александар Николоски, Владо Мисајловски, Гордана Димитриевска Кочовска и Тимчо Муцунски. Во тимот на коалицијата „Вреди“ се Азир Алиу од Алијанса на Арбен Таравари, Висар Ганиу од Демократско движење, Аднан Азизи од Беса и Башким Муртези од Алтернатива.

Два дена по изборите претседателот на ВМРО-ДПМНЕ Христијан Мицкоски со потпретседателите имаше прва средба со лидерите на „Вреди“ Таравари, Касами, Меџити и Гаши во седиштето на албанската коалиција во скопската чаршија. По лидерската средба од ВМРО-ДПМНЕ соопштија дека се договорени општите начела на соработка за идната влада, која ќе се заснова на три постулати: евроинтеграции, забрзан економски развој, борба против криминалот и корупцијата и владеење на правото.