Либанската влада планира да презентира план на 31 август со цел да го убеди Хезболах да го предаде своето оружје, изјави специјалниот претставник на САД за Сирија и Либан, Томас Барак.

По состанокот со либанскиот претседател, Барак изјави во Бејрут дека Израел ќе презентира контрапредлог откако ќе добие увид во либанскиот план, објави Ројтерс.

Според него, иницијативата што ја подготвува Либан не мора нужно да предвидува употреба на сила.

„Либанската армија и влада не зборуваат за војна, туку за тоа како да го убедат Хезболах да се разоружа“, рече Барак.

Минатата недела, заменик-лидерот на Хезболах, Наим Касем, ги предупреди властите да не се соочуваат со организацијата поддржана од Иран, заканувајќи се дека „нема да има живот“ во Либан ако тоа се случи.
Прекинот на огнот постигнат со американско посредништво ја обврзува либанската држава да ги разоружа сите нерегуларни вооружени формации.

Касем објави дека Хезболах и сојузничкото движење Амал привремено ги прекинаа уличните протести против иницијативата поддржана од САД, оставајќи простор за дијалог со властите.

Сепак, тој предупреди дека идните демонстрации би можеле да бидат насочени кон американската амбасада во Бејрут.

Канцеларијата на израелскиот премиер Бенјамин Нетанјаху објави дека Израел би можел да го намали своето воено присуство во јужен Либан доколку либанската армија преземе конкретни чекори за разоружување на Хезболах.