Фудбалерите на Лестер сити ја продолжија лошата форма оваа сезона со уште едно разочарување, убедлив пораз од 0:3 од Њукасл на домашен терен.

Навивачите на клубот се разочарани, моментно „лисиците“ се на претпоследното 19 место во Премиер лигата и се блиску до испаѓање.

Лестер испиша негативна страница во историјата на англискиот професионален фудбал, со што стана првата екипа во сите четири дивизии што загубила осум последователни натпревари на домашен терен без да постигне гол. Кошмарната серија започна на 22 декември со пораз од 0:3 од Вулверхемптон, а потоа следуваа нови порази: 0:2 од Манчестер сити, 0:2 од Кристал палас, 0:2 од Фулам, 0:2 за Арсенал, 0:4 од Брентфорд, 0:3 од Манчестер јунајтед и на крајот 0:3 од Њукасл. Лестер во овој период прими вкупно 21 гол на домашен терен, без ниту еднаш да ја најде противничката мрежа.

Тимот на Руд ван Нистелрој ги загуби последните осум натпревари во Премиер лигата, а исто така беше елиминиран од ФА Купот по драматичниот пресврт на Манчестер јунајтед на „Олд Трафорд“.

Лестер нема победа на домашен натпревар од 3 декември кога го победи Вест хем со 3:1. Оттогаш забележа 15 порази во 17 натпревари, а единствените бодови се нерешените 1:1 со Брајтон и изненадувачката победа од 2:1 на гостувањето кај Тотенхем.