Килијан Мбапе се наоѓа во центарот на вниманието откако во текот на вчерашниот ден повторно се појавија најави од најголемите француски медиуми дека сака да го напушти ПСЖ.

Мбапе во летниот преоден рок и покрај понудата од Реал Мадрид одлучи да остане во Париз и тоа беше изненадување за голем дел од фудбалската јавност. Мбапе наводно е незадоволен дека не му биле исполнети одредени ветувања, а не бил среќен ниту со позицијата на која игра.

Желбата на Мбапе е да игра како централен напаѓач, додека во ПСЖ тренерот Галтие го користи на крило. Легендарниот Тиери Анри се огласи на оваа тема, го критикуваше Мбапе и порача дека клубот во секоја ситуација треба да биде над секого.

„Ќе ви ја објаснам таа ситуација со личен пример. Ниту јас не сакав да играм на кирло во Барселона, но тоа го правев за екипата. Постои едно правило и тоа е многу јасно – ако тренерот бара од вас да направите нешто што ќе помогне на екипата, вие тоа го правите. Во случај да не му оди на тимот на тој начин тогаш би реагирал“.

Анри смета и дека Мбапе навикнал во кариерата досега да му се исполнува се што ќе посака.

„Верувам дека никогаш не добил „не“ во кариерата. Не знам кои се условите кои биле договорени затоа што не сум бил таму, но очигледно дека му пречи тоа што не игра на позицијата класична деветка. Но, на крајот клубот е над сите, меѓутоа многу големо прашање е и дали во ПСЖ му ставиле до знаење дека клубот секогаш е на прво место“, потенцира Анри.