Легендарниот шпански голман Пепе Реина го најави крајот на својата професионална кариера, која официјално ќе ја заврши ова лето, откако ќе го одигра својот последен натпревар за Комо. Со тоа, 43-годишниот ветеран ќе се фокусира на нови предизвици во тренерските води.

Во својата долга и трофејна кариера, Реина настапуваше за некои од најголемите клубови во Европа: Барселона, Ливерпул, Наполи, Баерн Минхен, Милан, Лацио, Астон вила и Виљареал, а сезонава забележа 12 настапи за италијанскиот калчолигаш Комо. Последниот натпревар во неговата кариера ќе го одигра во петок, против Интер.

Во едно неодамнешно интервју, Реина призна дека минатото лето бил нервозен по заминувањето од Виљареал како слободен играч, бидејќи „не можел да пронајде проект што навистина ќе го возбуди“. Сепак, на крајот се приклучи на Комо, каде што повторно соработуваше со својот стар пријател и поранешен репрезентативен соиграч Сеск Фабрегас, кој е тренер на клубот.

Двајцата беа дел од златната генерација на Шпанија, која доминираше на светската сцена, освојувајќи го Европското првенство во 2008 година, Светското првенство во 2010 и уште едно Европско во 2012 година.