Легендарниот хрватски голман Венио Лосерт ќе биде нов тренер на голманите на Вардар
Поранешниот хрватски голман и член на златната генерација на „коцкестите“, Венио Лосерт, е новиот тренер на голманите на Вардар. Лосерт во Вардар доаѓа на местото на Александар Рогановиќ кој си заминува поради здравствени проблеми.
Препорачано
Лосерт моменто е тренер на голманите египетската репрезентација каде селектор е поранешниот тренер на Вардар, Роберто Гарсија Парондо. Лосерт исто така беше дел од репрезентацијата на Египет како тренер и во времето кога селектор беше новиот стратег на Вардар, Давид Дејвис.
– Доаѓам во Вардар и секако дека тоа е еден нов предизвик за мене. Кога работиш со клуб треба да се грижиш голманите да бидат постојано во форма и да нема осцилации. Со репрезентација се работи за одржување и подобрување на формата за пократок период. Кога Дејвис се договори со Вардар ме праша дали сум заинтересиран да му помогнам. Од Египет дозволија, и ете сум во Вардар. Го следев Вардар во ЛШ, и можам да кажам дека има добри и квалитетни голмани. Ќе се обидам да помогнам, да бидат уште подобри и поконстантни. Верувам ќе имаме добри резултати“ – изјави Венио Лосерт за официјалната интернет страница на РК Вардар.
Како тренер на голмани работеше и во Веспрем во 2016 година, а тогаш беше и тренер на голманите на младинските селекции на Хрватска и на сениорскиот тим. Таа година, Хрватска го освои среброто на ЕП 2016 година во Полска.
Во богатата играчка кариера Лосерт има настапувано за екипите на Загреб, Сарагоса, Тека Сантандер, Грањолерс, Портланд Сан Антонио, Кангас, Барселона, Кретеј, Адемар Леон, Копенхаген, Кјелце и Монпелје.
Со Загреб четирипати играше во финалето на тогашниот КЕШ (1995, 97, 98 и 1999), со Кјелце настапи на нивниот прв Ф4 во Келн, со Барселона и Портланд ги освојуваше Асобал лигата, Кралскиот куп, Супер купот на Асобал…
На репрезентативен план има златни медали од Олимпијадите во Атланта 1996 и Атина 2004, и плус бронза од Лондон 2012. На СП освои три сребрени медали, во 1995, 2005 и 2009. Од ЕП има два бронзени медали, во 2012, а во 2016 беше тренер на голманите.
Вардар ги почнува подготвките за пролетниот дел од сезоната на 10 јануари, и остануваат да се одиграат уште четири натпревари од ЛШ. Остануваат уште шест кола од регуларниот дел на сезоната, а треба да почнат и натпреварите од СЕХА лигата.
