Со невидена манипулација и обезличување на изборната регулација во Сојузот на здруженијата на пензионери на Македонија (СЗПМ), со нејзино тотално обезвреднување при засилено полициско и агенциско обезбедување, неславно завршија изборите во нашата најмасовна пензионерска организација. Раководството на СЗПМ, дали од страв или од срам – не знам, ангажираше „одред“ полицајци за одбрана и заштита од асиметрични закани и замислени неидентификувани инокосни напади од сопствените редови, или пак, од совеста (што не верувам) за свесното влегување во незаконска и криминална зделка во спроведувањето на изборите.

Како и да било, највисокиот орган во Сојузот на здруженијата на пензионери пред почетокот на изборот го загуби значењето со мачењето на организаторите при заклучувањето на вратите за да останат внатре само делегатите и во манипулацијата впрегнатите?!

Не, бе, луѓе, каква манипулација, каква легализација на криминализација, каква репарација и конформација, каква фотелјализација и прпација од протестација?! Ништо нема од тие работи?! Ова е „масло“ на  некои амбициозни и љубоморни незадоволници што не можат да дојдат на нивните места, па измислуваат нелегалност, нелегитимност и незаконитост во изборните активности, само да му наштетат и да му го нарушат комодитетот на старото, односно сега истото – ново раководство?!

Некои зли јазици и нивни предавници кажуваат дека овие старо-нови раководители се двоумеле што да прават за ништо да не направат. Прво имало согласност воопшто да не организираат избори, за да не трошат пари (не верувам), па се предомислиле формално да ги спроведат изборите колку да ги замајуваат пензионерите и да ги оправдаат парите. Всушност, преовладало ова второто, ама и првото за да останат истите и да се стават на листите! Толку умно и заплеткано го подготвиле изборот за никој да не може да им влезе во таборот?!

Еден нивен инсајдер во целост ми ја наслика постапката на реизборот на претседателката и на нејзините до неа. Толку убаво било организирано, што поубаво и не можело да биде. Сè се одвивало како на филмска лента: од изборот на кандидационата комисија со единствената стара кандидатка, која наменски ја променила адресата на живеење за да обезбеди поддршка што ја немала од базното здружение, па до изборот на записничар, на заверувачи, оверувачи и поравнувачи, на излагачи и излегувачи, на определени дискутанти и за високи функции аспиранти и така натаму и така наваму без консултанти и деманти?!

Искрено, не изразив интерес за ангажирањето на помошниот персонал, кој и во претходните владеења беше вклучуван за гласање, за да се добие импресија пред медиумите дека нема репресија и спроведување планска нарација за да нема реакција при изборот со акламација?!

Здивот да ти застане од убавина која само тие незаменливите,  самобендисаните и збеснатите по функции можат да ја почувствуваат. Којзнае, можеби е тоа и некаква катарза, некакво прочистување и воспоставување душевна рамнотежа за безболно враќање во претходна состојба нарушена од протестот и претрпениот страв од претставници на најголемиот дел пензионерски здруженија, кога дојдоа пред седиштето на СЗПМ и решително се спротивставија на безредието по легализацијата на манипулацијата во изборите на организацијата. Своето незадоволство и револт тие го искажаа со писмен проглас до Сојузот и надлежните органи, од кој го истакнуваме следното:

Не може повеќе да се издржи и да се толерира нечесноста, незаконитоста и манипулацијата во управувањето со здруженијата. Нема да дозволиме организацијата да ја водат незнајковци, полтрони, камелеони, непотисти, клиентелисти и сите други исти послушници и поборници за лични интереси. Со конкретни мерки и законски постапки веднаш ќе им ставиме крај на недомаќинското работење и на неконтролираното трошење на пензионерските пари.

Нашата цел не е уривање на раководствата и одземање на тронот на доживотно закотвените функционери во Сојузот и здруженијата на пензионери, туку целосна реорганизација и облагородување на организацијата, за да ја направиме полезна за сите пензионери, за да им помогнеме на оние на кои најмногу им е потребна помош и секој пензионер да го почувствува бенефитот од парите што ги издвојува од својата пензија.

Ќе воведеме нов начин на финансирање и работење исклучително во полза на пензионерите и ќе бараме законски да се раздвои членарината од фондот за посмртна помош и тоа да биде на доброволна основа. Наедно, ќе се заложиме и за нов начин на дејствување на организацијата по примери и искуства од други  пензионерски организации во соседството, во Европа и пошироко.

Согласно постојните прописи, ќе изготвиме нов статут на Сојузот со регулирано ограничување на мандатот на сите избрани и ангажирани лица во органите и телата и тој да биде само еден единствен и ништо повеќе.

Ќе ја прошириме програмата за работа во Сојузот и здруженијата на пензионери со нови содржини и активности во кои ќе можат соодветно да се вклучат сите категории на пензионери. Приоритет во дејствувањето ќе имаат социјалните, хуманитарните, еколошките и културно-рекреативните активности, со посебна грижа и помош на изнемоштени и осамени лица, како и заштита на здравјето и стандардот на пензионерите.

Затоа, не ги признаваме овие избори, а на новите ќе избереме чесни, хумани, мудри и витални пензионери кои ќе бидат подготвени волонтерски да работат и да ги извршуваат раководните и другите функции во организацијата!

(Авторот е писател)