Поради дојави за бомби наставата во повеќе основни училишта низ Македонија денеска беше прекината, а проверките на полицијата покажале дека станува збор за лажна тревога.

„По мноштвото пристигнати пријави за наводно подметнати експлозивни направи во повеќе основни и средни училишта на речиси цела територија на државата, надлежните служби преземаат сеопфатни плански мерки и активности во согласност со внатрешните процедури за постапување во случај на терористичко загрозување“, соопшти Министерството за внатрешни работи (МВР).

Од МВР информираа дека е формиран оперативен штаб и во координација со безбедносно-разузнавачките служби извршиле процена на степенот на загрозување и апелираат за смиреност во јавноста и воздржување од ширење дезинформации околу ваквите настани.
Лажни се дојавите за бомби во училиштата во државата, работната група одржува состанок, насоките ќе стигнат до институциите, соопшти премиерот Христијан Мицкоски од Велес.

– Јас постојано бев во контакт со министерот за внатрешни работи, ме брифираше и конечно имам пресек, досега сите без исклучок се лажни дојави. Тие се тие напади хибридни напади што ќе се случуваат, не е нешто неочекувано, ќе треба да се подготвиме. Постапено е според протоколот за ваков тип напади. Имаше пред некој ден и во Хрватска, претходно во институциите во Унгарија, и претпоставувам дека ова ќе биде ќе биде континуитет кај нас, но мислам дека се креира еден протокол – рече премиерот.

Министерката за образование и наука Весна Јаневска соопшти дека е формирана меѓуресорска група за поефикасно справување со ситуацијата и ги повика раководствата на училиштата дојавите да ги пријавуваат во МВР и да ги следат протоколите на полицијата. Јаневска апелираше до наставниците и до директорите на училиштата за комуникација да ги користат исклучиво службените електронски адреси креирани од МОН. Како што рече, според првични информации, дојавите не се добиени на службени, туку на приватни мејлови, и затоа тие не треба да се користат.

Министерката информираше дека безбедноста е подигната на повисоко ниво со двојна автентикација при користење службени мејлови.
Засега не е познато кој ги испратил лажните пораки на училишните мејлови.

За ситуацијата информираа и од Општина Аеродром, од каде што соопштија дека дојави за бомби имало во шест основни училишта во општината, додавајќи дека тимови на МВР веднаш излегле на терен и по извршените контроли учениците се веќе вратени на настава.

„По дојавите, беше постапено според протоколите што се преземаат во вакви ситуации, а децата беа безбедно евакуирани. Повикуваме на смиреност кај родителите, учениците и наставниот кадар“, пишува на службената фејсбук-страница на Општината.

На Фејсбук се огласија и градоначалниците на Гази Баба и на Бутел. Двајцата посочија дека пристигнала информација дека има дојава за бомби во неколку општински основни училишта и дека целосно и брзо е спроведен протоколот за безбедност и сите ученици се на безбедно во придружба на своите учители. Апелираа на смиреност и почитување на пропишаните правила и протоколи за постапување во вакви случаи.

Лажните дојави за бомби во училиштата не се новина кај нас. Во 2022 година безмалку еден месец имаше дојави за поставени бомби во скопските средни и основни училишта, како и во други објекти.