Откако Русија ја започна својата целосна инвазија на Украина, на социјалните медиуми се забележува пораст на дезинформации и видеа кои наводно прикажуваат снимки од војната на Москва – кога сликите всушност потекнуваат од видео игри, пренесува Еуроњуз.

На пример, видеа за кои се тврди дека ја прикажуваат украинската операција „Пајажина“ — која ја спроведе Безбедносната служба на Украина на 1 јуни — се широко споделувани на интернет.

ЕуроВерифај прегледа серија од овие клипови, кои собраа стотици илјади прегледи на платформите на социјалните медиуми, вклучувајќи ги ТикТок, Фејсбук и Јутјуб.

Иако на прв поглед може да изгледаат како да прикажуваат воени сцени – напади со ракети и беспилотни летала, како и бомбардирање на инфраструктурата – клиповите немаат никакви јасни знаци што ја потврдуваат нивната автентичност.

Со спроведување на обратно пребарување на слики, ЕуроВерифај откри дека голем број клипови за кои се тврди дека ја прикажуваат украинската операција „Пајажина“ всушност биле погрешно наведени и извадени од контекст – всушност, тие се совпаѓаат со видеа од игри објавени од Јутјуб канал наречен УВЦ.

Во биографијата на каналот се наведува дека „сите видеа на каналот се симулација на борбени операции во играта „Арма 3“. Ние сме против оваа ужасна војна и сакаме мирно небо над главите на Украинците“.

И покрај ова споменување, каналот – како и многу други слични гејмерски канали – објавува видеа со лажни наслови како што се „Најмасовниот украински напад со беспилотни летала уништи две најголеми руски фабрики на 1.000 км од границите“ и „Смел украински напад со беспилотни летала уништи 40 руски нуклеарни бомбардери: Ту-95, Ту-160, Ту-22М“.

Студиото за развој на игри „Боемија Интерактив“, кое го создаде „Арма 3“, одделно ги прегледало видеата испратени од „ЕуроВерифај“, кои беа објавени на платформите на социјалните медиуми, и потврди дека тие се направени со „модифицирана“ верзија на „Арма 3“.

„Модирањето“ на видео игри е популарна активност за гејмерите, каде што тие ги прилагодуваат карактеристиките или визуелните елементи на играта сами или со помош на додатоци и други материјали од трети страни.

„Боемија Интерактив“, како и многу други развивачи на видео игри, се изјасни против користењето на нејзините производи како „воена пропаганда“.

Иако снимките од видео игри постојано се вадат од контекст во врска со руската војна во Украина, ова е случај и со други војни и конфликти – бидејќи снимките од видео игри се презентирани и како снимки од војната меѓу Израел и Хамас, како и од неодамнешните тензии меѓу Индија и Пакистан на социјалните медиуми.

Утврдувањето дали снимката е вистинска може да биде многу сложена задача, што дури доведе до тоа одредени медиуми да емитуваат исечоци од видео игри на телевизија.

Во ноември 2022 година, романскиот канал Антена 3 емитуваше старо видео од Арма 3, за кое се тврди дека прикажува борби во Украина, дополнително барајќи од поранешен министер за одбрана и поранешен шеф на разузнавањето да ги коментираат сликите како да се автентични.