Новоформирана страница на Фејсбук, наречена „Транспортна карта на град Скопје“ на граѓаните им нуди можност до крајот на месецов да си купат картичка „скопска“ и за тоа да добијат бесплатен превоз една година. Дека станува збор за измама или за невкусна шега е повеќе од јасно, а тоа го потврдија и од ЈСП „Скопје“.

Град Скопје започна кампања за подобрување на животната средина, охрабрувајќи ги жителите повеќе да користат јавен превоз! Скопска карта нуди бесплатен градски превоз за една година! Не одлагајте! Специјалната понуда важи до 31 август 2024 – се вели во објавата.

Од ЈСП соопштија дека измамата веќе е пријавена во МВР.

ЈСП „Скопје“ утврди лажна вест со која е фалсификувано логото на електронската картичка „Скопска“ објавено на социјалните мрежи од страна на група наречена „Транспортна карта на град Скопје“, која не е поврзана со ЈСП „Скопје“. Се работи за измама со лажен линк што краде податоци од платежните картички на граѓаните. Јавно сообраќајно претпријатие  ја пријави измамата во МВР и очекува брзо постапување од надлежните за изнаоѓање на сторителите на измамата и очекува итно преземање на сите законски мерки за заштита на ЈСП, се вели во нивното соопштение.

Во услови кога состојбата со градскиот превоз е очајна, а јавното претпријатие во долгови, некој решил да се пошегува или да ги „изигра“ скопјани. Веруваме дека никого не измамиле со нивната објава и дека граѓаните не ги оставиле личните податоци.