Американскиот државен секретар Марко Рубио и рускиот министер за надворешни работи Сергеј Лавров разговараа за ситуацијата во Украина и развојот на билатералните односи во Њујорк, соопшти утрово руското Министерство за надворешни работи.

Според соопштението, Рубио и Лавров на средбата го потврдија својот заеднички интерес за решавање на кризата.

Лавров ја нагласи подготвеноста на Москва да се придржува до линијата дефинирана од претседателите на двете земји, Доналд Трамп и Владимир Путин, за време на средбата во Алјаска, пренесува РИА Новости.

Како што е наведено, Рубио и Лавров ја нагласија важноста од продолжување на работата на дипломатските мисии и се согласија да продолжат со конструктивниот дијалог меѓу нивните агенции за надворешна политика.

Државниот секретар на САД на средбата со рускиот министер за надворешни работи изјави дека Москва треба да преземе чекори кон трајно решение на конфликтот во Украина.

„Рубио го повтори повикот на американскиот претседател Доналд Трамп за запирање на убиствата и потребата Москва да преземе значајни чекори кон трајно решение на руско-украинската војна“, објави претходно Стејт департментот.

Претходно, руските медиуми објавија дека средбата меѓу шефот на руската дипломатија и американскиот државен секретар во Њујорк завршила синоќа.
Разговорите се одржале зад затворени врати и траеле еден час.

Последниот пат кога Лавров и Рубио се сретнале беше на маргините на настанот на АСЕАН во Малезија во јули оваа година.