Европското јавно обвинителство ја истражува можната злоупотреба на средствата на ЕУ во врска со реконструкцијата на железничката станица во Нови Сад, потврди во интервју за РТС главната европска обвинителка Лаура Ковеси.

Таа изјави дека станува збор за заеми од Европската инвестициска банка за реконструкција на железницата и станицата. Во конкретниот случај со Србија, добивме жалба од приватно лице и тоа беше основа за отворање на оваа истрага, рече Ковеси, наведувајќи дека очекува соработка од српските власти.

Обвинителката Ковеси нагласува дека Европското јавно обвинителство нема да се занимава со истрагата за самата несреќа во која животот го загубија 15 лица, туку дека е единствено одговорно за евентуална проневера на европските фондови.

Надлежни за постапката се судовите во Белгија или Луксембург, бидејќи таму е седиштето на потенцијално оштетените институции, вели Ковеси. Таа очекува соработка од обвинителството во Србија во обезбедувањето информации и докази.

-Ние сме првото транснационално европско обвинителство и наша главна надлежност е да истражуваме измами со пари на ЕУ и да ги заштитиме нејзините финансиски интереси. Имаме надлежност во 24 земји членки на Европското обвинителство, но и во трети земји во ситуации кога се користат пари од ЕУ и има потенцијална штета на некоја од европските институции. Тоа може да биде Европската комисија, Европската инвестициска банка или други институции кои финансираат проекти надвор од ЕУ. Нашата улога е да истражиме како се трошеле парите на ЕУ, дали се потрошени правилно, за целите за кои се доделени и затоа отворивме истрага во Србија. Да бидам многу јасна, ние не ја истражуваме самата несреќа во Нови Сад, не истражуваме како загинале тие млади луѓе и жртви. Тоа не е наша надлежност. Наша надлежност е да видиме дали има некаква злоупотреба на парите на ЕУ, корупција или перење пари во однос на парите од ЕУ во вкупната сума на пари доделени преку европскиот проект – рече таа, пренесува Коссев.