Европската Суперлига ќе стартува најдоцна есента 2025 година, а секој учесник ќе добие најмалку по 100 милиони евра, тврди претседателот на Барселона, Жоан Лапорта.

Европскиот суд за правда во Луксембург во декември донесе одлука дека УЕФА нема право да ги казнува клубовите кои би играле во уште едно натпреварување. Токму тоа го чекаа Барселона и Реал Мадрид кои се главните иницијатори за формирање на ова натпреварување.

Според зборовите на Лапорта прашање на време е кога Суперлигата ќе започне, а откри и имиња на клубови кои веќе прифатиле да учествуваат.

„Ако Суперлигата не започне следната сезоан, ќе започне сезоната 2025/2026. Секој клуб би добил по 100 милиони евра, а тие пари не можат да се заработат ниту со освојувањето на Лигата на шампионите. Кој не би играл? Барселона, Реал Мадрид, Интер, Милан, Наполи, Рома, Марсеј, Бенфика, Спортинг, Порто, Андерлехт, Клуб Бриж, три холандски и уште неколку големи клубови прифатија. Суперлигата би имала 16 или 18 учесници“, изјави Лапорта.

Од богатите клубови против Суперлигата е Пари Сен Жермен, Јувентус се повлече по промената на раководството, а нема ниту еден англиски тим.

„Не ме интересира за Англичаните, тие веќе имаат своја Суперлига која се вика Премиер лигата. Нашето натпреварување би се борело со Премиер лигата. На почетокот мислам дека нема да има Англичани, но би сакал да ни се придружат. Разговаравме многу со Манчестер Јунајтед, Ливерпул, Челси и Тотенхем“, додаде првиот човек на каталонскиот гигант.