Членовите на словенечката група „Лајбах“ во новото интервју, меѓу другото, зборуваа за откажаниот концерт во Киев, кој требаше да се одржи на 31 март годинава во салата „Бел Етаж“ под името „Евровизија“.

„Настапот не се одржа поради недоразбирање. На годишнината од воената агресија врз Украина сакавме да изразиме поддршка и солидарност со украинската држава и народ, па проверивме дали е можно да се одржи концерт во Киев. Контактиравме со професионалниот организатор на концертите, кој ни потврди дека таков концерт во Киев е можен и многу добредојден. За деталите преговаравме околу три месеци. И покрај фактот што организаторите ја одредија цената на билетите за концертот на речиси 20 евра, ние одлучивме да не бараме хонорар, туку целиот приход од билетите да ги донираме во добротворни цели и на жртвите од војната во Украина“, рекле тие за „Вечерњи лист“.

Концертот беше официјално најавен на 22 февруари, а билетите беа пуштени во продажба. Тие раскажалае дека веднаш по официјалната најава на концертот следувале жестоки реакции и незадоволство на социјалните мрежи поради некои нивни наводни ставови, па промоторот побарал нивна официјална и недвосмислена изјава дека бескомпромисно ја поддржуваат Украина и ја осудуваат Русија како агресор.

„Ние дадовме таква изјава, но додадовме и дека тоа не значи дека мразиме сѐ што е руско и дека сѐ уште безрезервно цениме некои руски уметници. Сепак, организаторот на 26 февруари одлучи да го откаже концертот поради сѐ уште големиот број на негативни коментари за нашите ставови. Нѐ информираше дека главната причина за откажувањето на концертот е нашето инсистирање на тврдењето дека Русија е главниот агресор во оваа војна, а не единствениот агресор и дека во целата приказна, всушност, станува збор за класична прокси војна, која Украинците никако не сакаат да ја слушнат“, навеле тие.

Тие исто така тврдат и дека списокот на руски уметници кои „Лајбах“ ги навел како своја инспирација наишол на неразбирање.

„Како што промоторот буквално рече: ‘За нас сега сè што е руско е отровно. Руската литература е зло, рускиот јазик е зло, сè што е руско предизвикува само омраза. Гледам дека не го знаевте ова, но вашите изјави предизвикаа доста огорченост’. Секако ни е жал што дојде до оваа забрана и очигледно го потценивме идентитетскиот проблем на Украина, но и понатаму остануваме на нашите ставови. Но, се надеваме дека ќе настапиме во Украина штом ситуацијата ќе биде зрела за тоа“, раскажале од „Лајбах“.

Откажан концертот на „Лајбах“ во Киев: Барале од нив да кажат дека сите Руси се лоши