Уште помалку од половина час имаат Социјалдемократите за да излезат на гласање за нов лидер на партијата. На денешните вонредни внатрепартиски избори право на глас имаат сите членови кои имаат електронска членка картичка.

На вонредните внатрепартиски избори учествуваат тројца кандидати, а членството на СДСМ гласа на 194 избирачки места во 80 општини во државата.

Во претседателската трка за лидер на најголемата владејачка партија влегоа тројца кандидати: Димитар Ковачевски, актуелен заменик-министер за финансии и член на Извршниот одбор на СДСМ, Фросина Ременски, поранешна пратеничка и екс-потпретседателка на СДСМ и Јован Деспотовски, актуелен директор на Дирекцијата на ТИРЗ, кои веќе гласаа во своите општини.

Својот глас во Струмица за еден од кандидатите го даде и претседателот Зоран Заев.

СДСМ овие избори како и претходните, во март на 22. Конгрес на партијата кога беше потврдено лидерското место на Зоран Заев ги смета за врв на внатрепартиската демократија.

Согласно Правилникот за постапката и роковникот, активно се регистрирани 51 228 членови на СДСМ, а пријави се пристигнати и по истекување на предвидените рокови.

Според Богданка Кузевска до 18 часот гласале 78,5 проценти од активно регистрираните гласачи, односно 40.220 Социјалдемократи.

-Во 19 часот се затвораат гласачките места и следува пребројување на гласовите, по што е предвидена и прес конференција на Централната изборна комисија на која ќе се соопшти првичната оценка од денешниот избор на претседател на СДСМ како и резултатите од вонредните внатрепартиски избори за претседател на СДСМ , рече Кузеска во изјава за „Слободен печат“.

-Доколку ниту еден од тројцата кандидати не освои мнозинство од 51 процент од бројот на излезените гласачи, ќе има и втор круг од овие избори за претседател, рече Кузеска.