Фудбалерот на Барселона, Филипе Кутињо, во зимскиот преоден рок може да се врати во Премиер лигата и тоа во Ливерпул, но не во „црвениот“ туку во „синиот“ дел од градот, пишува „Мундо Депортиво“.

Весникот пишува дека Евертон е сериозен во намерата да го ангажира Кутињо во зимскиот преоден рок. Идејата на Евертон е да го донесе Бразилецот на шестмесечна позајмица со задолжителен откуп идното лето, но Барселона која се наоѓа во големи финансиски проблеми ѝ и се потребни пари, инсистира на трансфер уште во јануари.

Каталонскиот весник пишува дека на крајот ќе биде најден заеднички јазик помеѓу двете екипи и Кутињо ќе се врати во Премиер лигата и во Ливерпул, но ќе ги разочара навивачите на „црвените“.

Имено, Кутињо пред да пристигне во Барселона, пет години настапуваше за Ливерпул и на 152 натпревари во сите конкуренции постигна 41 гол.