На конференција за новинари за време на претставувањето на програмата на новото издание на фестивалот за музика и филм, Кустендорф, режисерот Емир Кустурица, изјавил дека во авторството пред триесетина години било најзначајно што се случува и дека тоа било органско, а дека денеска режисерите ја губат својата функција, пренесуваат српските медиуми.

– Живееме во општество на спектакли, отруени од Холивуд. Поради ефектот на пазарот, режисерите денеска ја губат функцијата, па поради тоа фестивалот Кустендорф им е посветен на нив – рекол Кустурица.

Натпреварувачката програма за фестивалот било најавено дека ќе содржи 21 филм од домашни и странски автори, а се очекува да бидат прикажани и 17 краткометражни и 4 документарни филмови, пренесува Данас.рс.