„Република Косово е навистина најмладата држава на стариот континент, но можеби има и најдолга историја на напори за нејзино создавање. Додека ја одбележуваме 17-годишнината, да се потсетиме на сите жени и мажи кои се бореа и се жртвуваа за овој ден во кој уживаме денес. Ние сме автохтон народ, што значи дека нашата историја ниту започнува ниту завршува во една генерација“, рече денеска премиерот на Косово Аљбин Курти на плоштадот во Приштина.

На Косово денеска со низа активности се одбележува 17-годишнината од прогласувањето на независноста на земјата. Втора година по ред 17 февруари го одбележа и општина Северна Митровица (без Србите, кои во ноември 2022 година ги напуштија косовските институции). Одржана е и формална седница на косовската влада.

Претставниците на значајните западни земји кои го признаа Косово упатуваат честитки заедно со пораки за аспирациите за напредок на Косово на европскиот пат, но и подвлекување на клучните услови – нормализација на односите со Белград и исполнување на обврските преземени во дијалогот.