Манчестер јунајтед го претстави своето прво големо засилување за новата сезона, бразилскиот напаѓач Матеус Куња, кој пристигна од Вулверхемптон во трансфер вреден околу 75 милиони евра.

Куња, кој со своите настапи се етаблираше како еден од најдобрите напаѓачи во Премиер лигата денеска официјално потпиша договор и беше претставен како нов играч на „црвените ѓаволи“.

На своето прво обраќање како играч на Јунајтед, 25-годишниот напаѓач откри детали од своето скромно детство во Бразил и љубовта од деството кон гигантот од „Олд Трафорд“.

„Тешко е да се опише со зборови што значи за мене да станам дел од Манчестер Јунајтед. Како дете, одевме кај баба ми, таа беше единствената што имаше телевизор и таму ги гледавме натпреварите од Премиер лигата. Секогаш навивав за Јунајтед, сонував да го носам овој дрес. Му благодарам на семејството и на сите што ми помогнаа да го остварам овој сон“, изјави Куња.

Тој нагласи дека неговиот фокус е целосно насочен кон тоа да му помогне на Јунајтед да се врати на врвот на англискиот фудбал.

Спортскиот директор на клубот, Џејсон Вилкокс, изјави дека доведувањето на Куња било врвен приоритет уште на самиот старт од летниот преоден рок.

Куња за Вулверхемптон одигра 90 натпревари, на кои постигна 33 голови и забележа 15 асистенции. Во последната сезона запиша 15 голови само во Премиер лигата, што го вброи меѓу најпродуктивните напаѓачи во Англија.