Обвинителката Жаклина Крстевска пред почетокот на денешното продолжение од рочиштето за убиствата н 14-годишната Вања Ѓорчевска и 74-годишниот Панче Жежовски информираше дека Обвинителството не може да го обезбеди сведокот Гоце Трајковски. Тој е клучен во истрагата бидејќи тој ги има обезбедено клучните снимки преку кои е направено поврзување меѓу возилото „Цитроен“ што поминувало пред зградата на Вања Ѓорчевска и сопственикот на возилото Панче Жежовски. Тоа пак ги однесе истражните органи во седиштето на партијата Десна од каде почнаа расветлувањата на двете убиства.

Обвинителката го информираше судијата Ивица Стефановски дека лицето не се наоѓа на пријавената адреса. Гоце Трајковски е син на Кираца Трајковска која на едно од минатите судски рочишта посочи дека тој имал панични напади и затоа не дошол да сведочи. Полицијата оттогаш објави дека го бара за друго дело.

Судијата најави дека ќе се обидат да го обезбедат Трајковски, па дури потоа ќе одлучи што ќе прави со овој сведок.

На тоа се надоврза адвокатот на обвинетиот Александар Ѓорчевски, Владимир Туфегџиќ, кој побара во судот да се чита исказот што Трајковски го дал во Обвинителството.