Ана Крстаноска е млада и креативна жена, која стои зад еден од најубавите инстаграм-профили за храна кај нас – „Ана кичен корнер“ (ana_kitchen_corner).

Готвењето ѝ е вистинска пасија и хоби на кое му пристапува со голема љубов и посветеност.

– Приготвувањето храна го доживувам како мое хоби, кое го надополнувам со многу љубов и внимание секогаш кога сум во можност. Среќна сум кога им спремам нешто вкусно на моето семејство и моите пријатели и токму тоа ми ја полни душата со позитивна енергија – вели таа.

Денеска ви го претставуваме нејзиниот рецепт за старинска пита со сирење.

– Оваа пита е лисната, мека како памук а од надвор крцкава полна со сирење – вели Крстаноска.

Потребни состојки:

• 550-600 г брашн
• 200 мл млака вода
• 20 г свеж квасец
• 1 лажичка шеќер
• 50 мл масло
• 2 јајца
• 1 лажичка сол
• 100 г маргарин
• 250 г тврдо сирење
• Јогурт за премачкување + сусам

Подготовка:

Во длабок сад измешајте млака вода, квасец, шеќер и малку брашно. Оставете да стаса 10 минути. Додајте ги јајцата, маслото и солта, па постепено додавајте брашно. Прво мешајте со лажица, а потоа замесете меко тесто. Оставете го да одмори 15 минути. Стопете го маргаринот и издробете го сирењето. Премачкајте кружен плех (34-36 см) со маргарин. Од тестото формирајте 8-10 топчиња. Секое расукајте го колку чинија, премачкајте со маргарин и наредете во плехот, нежно истегнувајќи кон рабовите. Врз секоја кора наросете сирење. Повторете ја постапката со сите кори, освен со последната. Спојте ги горната и долната кора така што ќе ги прилепите краевите. Може лесно да ги притиснете одозгора за подобро соединување. Исечете ја питата на квадрати и оставете ја да одмори 15 минути. Премачкајте со јогурт, наросете сусам и печете во загреана рерна на 200 степени околу 30 минути. К.С.